خالد بيبو: تعرضت لانتقادات بعد واقعة إخفاء الكرات في القمة.. ومش هشيل كورتين معايا وأنا بلاعب الزمالك
علق خالد بيبو مدير الكرة بالنادي الأهلي، على الفوز الذي حققه الفريق الأحمر على حساب مازيمبي والتأهل إلى نهائي دوري أبطال إفريقيا.
وقال خالد بيبو في تصريحات تليفزيونية: بشكر جمهور الاهلي على المساندة ووجودهم بيفرق معانا وبيفرق معايا شخصيا، وأنا أما بشوف الجمهور ببقا طاير، ولولا وجودهم كان ممكن المباراة تهرب مننا.
وأضاف: هناك نقاط عديدة فقدناها في بطولة الدوري بسبب عدم وجود الجمهور الذي يعطي الدافع للاعبين.
وأكمل خالد بيبو تصريحاته: أول ما الفريق بيخسر أنا أول واحد بيتم انتقادي، لكن أنا هستحمل ومعنديش مشكلة، وهقدر اتعامل ومش بتأثر ومش بزعل، بس أهم حاجة محدش ينتقد اللعيبة.
وأوضح: أنا لعبت في أجواء أصعب واللي لعب جوة الملعب وشاف أمور صعبة مش هيتأثر باللي برة الملعب.. ومن حق الجمهور أن ينتقد لكن أتمنى أن يكون الانتقاد واقعي على الأحداث والشغل.
وعما حدث في مباراة القمة، زاد خالد بيبو خلال تصريحاته: في مباراة الزمالك الأطفال الصغار قاموا بإخفاء الكرات ولم يتم توجيه الانتقاد لهم.. ومن تم انتقاده هو أنا ولم يأت أحد بسيرة من قام بهذا الفعل وصاحب المشكلة.
وأكد: مش هلعب ضد الزمالك وأشيل كورتين معايا، أنا بلاعب فريق كبير، ومش هفكر إني ألم كور، ودا اللي قاله سيد عبد الحفيظ.
وشدّد خالد بيبو: الزمالك كان بقاله فترة كبيرة مش بيكسب الأهلي فـ ممكن يحصل أي حاجة جوة المباراة يعني.
وعاد للحديث عن مباراة مازيمبي، قائلًا: لازم نكسب وكان عندنا إصرار المكسب وقدرنا نجيب 3 أهداف وهي الكورة كدة.. عندنا اسكواد محترم ولاعيبة كتيرة تقدر تشيل المسؤولية ووسام بياخد خطوات مع الجمهور وجوة الفريق وبيتعب ويشتغل، ولكن عندنا لاعيبة كتيرة جوة التيم وأي لاعب جوة الملعب بيعمل المجهود لأن كلنا تيم واحد.
واختتم خالد بيبو تصريحاته: النهاردة هنفرح ونبدأ بكرة نركز في اللي جاي، لكن شغلي هيبدأ من دلوقتي على السفر والتأشيرات لتونس والشغل الإداري وأنا بيكون ليا دور محدد ومش مستني، ومش عاوز آخد "سوكسيه"، ومش عاوز حد يشكرني على شغلي لأن دا شغلي وبس.
