محمد صبحي يرد على منتقديه عبر "القاهرة 24": "دول ناس جهلة.. وأكيد مش هقدر أعمل تمثال لكل مُكرم"
موجة من الانتقادات طالت الفنان الكبير محمد صبحي، منذ أمس، عبر مواقع التواصل الاجتماعي، وانقسمت الآراء بين مؤيد ومعارض، بسبب وضع صورته كتمثال صغير على رأس الجائزة التي منحها لزملائه الفنانين في الاحتفالية التي أقامها مساء يوم الجمعة، تحت عنوان "50 سنة فن".
ورد الفنان محمد صبحي على منتقديه، في تصريح خاص لـ"القاهرة 24"، وقال: "الانتقادات لا بقرأها ولا أحب أعرفها، ودول ناس محضرين نفسهم علشان يسيبوا كل حاجة ويمسكوا في حاجات زي كدة، ودول ناس جهلة".
وعن وضع صورته على التمثال قال: "ده شيء طبيعي لأن أنا اللي بكرم الناس، ومكتوب حيثيات التكريم، ومكتوب اسمهم، وحبيت أسيب ذكرى عندهم، وأنا يهمني الفنانين اللي اتكرموا، لإني عامل الاحتفالية دي علشان أكرمهم، وكفاية إن هما كانوا فرحانين، ومهياش جايزة بلاستيك زي اللي بيعملوها، ويكتبوا عليها اسم الشركة أو اسم النادي، وميكتبوش السنة واسم المكرم".
وتابع: "لكن أنا عامل شيء قيم ومتكلف جامد، والدكتورعبد المجيد إسماعيل، هو اللي نحت التمثال ده على شكل مصغر، والتمثال الأصلي اللي كان عمله جمال السجيني، اللي عمل تماثيل لطه حسين وأم كلثوم وعباس العقاد، وجه سنة 1976، وعملي التمثال ده، وأكيد مش هقدر أعمل تمثال لكل مكرم".
شادي خفاجة يرد على منتقدي جائزة محمد صبحي: "حلوة لمهرجانات الجونة ووحشة للي شقيوا بجد!"
محمد صبحي يكرم زملاءه ويطالب الرئيس بإنقاذ الفن المصري (صور)
