ننشر أقوال صديق طفل المرور: "الصدفة وراء تصوير فيديو الأزمة" (مستندات)
يواصل "القاهرة 24" نشر نص التحقيقات في قضية طفل المرور، والتي أثارت موجة عارمة من الغضب على مواقع التواصل الاجتماعي، بعد إهانة الطفل و3 من أصدقائه، لأحد رجال الشرطة والتنمر به.
ووجهت النيابة العامة في سؤالها إلى المتهم رامز عصام صديق طفل المرور عدة أسئلة جاءت على النحو التالي.
تقرير إدارة التكنولوجيا: طفل مرور المعادي أرسل مقطع فيديو تعديه على الشرطي لفتاة للاستعراض
س: ما أقوالك عن يوم حدوث الواقعة؟
ج: اللي حصل "إن يوم الاثنين 26 أكتوبر2020، كنت في المعراج، عشان كنت لسه مخلص المدرسة، ورحت أقابل مصطفى تامر صاحبي في المعراج وبعدين جالي تليفون من أحمد أبو المجد، واللى شهرته حريقه وقالي إنه قاعد في بنزينة وطنية، اللى في شارع الخمسين أمام المرور، سألته أنت بتعمل ايه قالي قاعد في البنزينة، هو ويوسف أبو عوف وعمرو أحمد اللى شهرته تايسون، وقولت له أنا هاروح له ومعايا مصطفى تامر وفعلا روحنا، ولما اتقابلنا فى البنزينة قولنا نروح ناكل في مطعم أسمه كوينز اللى في المنطقة".
وأضاف المتهم إن "أحمد أبو المجد ركب العربية المرسيدس لونها أسود، وأنا قاعد وراء في النصف على يميني مصطفى تامر وعلى شمالي عمر أحمد، واللى سايق أحمد أبو المجد واللى جنبه يوسف أبو عوف، ورحنا ماشين وأول ما وصلنا ميدان بتشو، كان فيه أمين شرطة وقف أحمد بالعربية، وسأله عن الرخص وكان قبلها على طول مصطفى تامر كان بيصور بموبايله فيديو استورى، وصادف وجود أمين الشرطة بواقعة التصوير، وأحمد أبو المجد رد على أمين الشرطة، قاله أنا مش معايا رخص، وبعدين أحمد قاله فين كمامتك راح أمين الشرطة قاله مش معايا راح أحمد، قاله ابعد عني وأنت بتتكلم معايا، رد عليه أمين الشرطة قاله سيب العربية أو أقف ووقف العربية حاجة زى كده، راح أحمد أبو المجد اتحرك بالعربية عشان يمشي راح أمين الشرطة شطه برجله بباب العربية ناحية الزجاج الخاص بالعربية اللى عند أحمد، راح أحمد وهو ماشي طلع دماغة من العربية وهو ماشي وقاله الفاظ بذيئة، ومشينا لكن أحمد قال هرجعله علشان هو شاط العربية برجله، و لف أول دوران وركن العربية ونزل منها هو ومصطفى وعمرو وفضلت أنا ويوسف في العربية".
س: متى وأين حدث تلك الواقعة تحديدا؟
ج: الكلام ده حصل يوم الاثنين 26 أكتوبر2020 حوالي من الساعة الثانية حتى الساعة الثالثة والنصف عصرا، بميدان بيتشو آخر شارع الخمسين زهراء المعادى.
س: ما سبب مناسبة تواجدكم بالزمان والمكان سألفي الذكر؟
ج: أنا روحت اقابل أحمد أبو المجد في البنزينة الوطنية لما كلمني في التليفون وطلب مني إن اروح اقابله في البنزينة أنا ومصطفى.
س: من كان برفقتك انذاك؟
ج: كان معايا مصطفى تامر روحنا قابلنا أحمد ابو المجد في البنزينة الوطنية وكان معايا عمرو أحمد وشهرته تايسون ويوسف أبو عوف.
س: ما صلتك بكل من سالفي الذكر تحديدا؟
ج: احنا كلنا أصحاب من المعادي.
س: ما الفئة العمرية لكل من سالفى الذكر؟
ج: هو أنا ومصطفى ويوسف وعمرو من نفس السن تقريبا، وأحمد هو اللى اصغر مني.س: ما سبب تكوين تلك الصداقة مع المتهم أحمد ابو المجد مع اختلاف الفئة العمرية بينكما؟
ج: عشان هو من المعادى.
رخصة سيارة “نجل القاضي” منتهية من 2015.. ننشر أقوال الشرطي في واقعة طفل مرور المعادي (خاص)
