يسرا اللوزي: "مش عشان ممثلة أقبل التنمر ببنتي" (فيديو)

تحدثت الفنانة يسرا اللوزي، عن ردها على متابع تنمر بابنتها ووصفها "أم الطرشة"، بعد حديثها عن ابنتها الصماء خلال لقائها مع الإعلامية منى الشاذلي ببرنامج "معكم" مؤخرًا.

وقالت يسرا اللوزي أثناء مكالمة هاتفية في برنامج "السفيرة عزيز"، عبر شاشة "DMC": "هو في العادي طبعا بيكتب أحيانا شتايم بتكون ألفاظ  خارجة وطبيعي الواحد بيكون عايز ينضف الكومنتات عنده ساعات فبيمسح الألفاظ دي عشان مش تكون عنده، بس أنا حسيت أني مش هرضى أقبل التنمر على بنتي ولا على أي بنت".

وتابعت: "أنا زي أم مش ممثلة مش أقبل أي حد يغلط في بنتي وللأسف، إحنا عملنا للشخص ده اهتمام أكبر من حجمه، وللأسف الكائنات دي موجودة كتير، وأنا معرفش اللي كتب الكومنت ده عنده عقده نفسية ولا نقص وده موجود للأسف في كل بلاد العالم".

وأضافت: "أنا مش هراضي حد ولا هغير وجهة نظر حد في الآخر ومش هقدر امنع التنمر الموضوع أكبر مني ومن العالم كله،  بس في الآخر حبيت استغل فرصة أن عندي جمهور كبير متابع الموضوع وهيقف معايا ويساندني، وأنا دائما لما بيكون في حاجة سلبية بحرج الناس على الذوق عشان محدش يمسك عليه أن أنا غلط أو اشتمت بعمل كده طريقة معينة حتى لو هكتب سطرين احرجه بالذوق ولما بقيت الفانز بيشوف ده بيقوموا داخلين بقى يرودو".

وسبق وردت يسرا خلال البرنامج على التنمر الذي تعرضت لها بسبب زيادة وزنها، قائلةً: "كنت بقعد أضحك لما قالوا أني عملت عمليات تجميل، ليه كل الناس فاهمة إن الفنانات بيعملوا عمليات تجميل، مش هعرف أغير للناس وجهة نظرهم، فيه تنمر، أنا مستغربة جدًا بخصوص الوزن، وأنا أول مرة أعاني من ده، مع إن ده مش أول مرة، اللي استغربته إننا في مجتمع شرقي يعني جسم الست عندنا مش رفيع، مختلف عن الأوروبيين، يعني استغربت الناس، هما أكيد عندهم قرايب خلفوا ووزنهم زاد، ترددت أني أوافق على أن أكون ضمن لجنة تحكيم في القاهرة السينمائي، ولكن محمد حفظي أقنعني، وقررت أني هطلع عشان أنا بني آدمة طبيعية".

متنمر على "يسرا اللوزي" بسبب صمم ابنتها: "يا أم الطرشة".. وترد: "شكرًا لذوق حضرتك وفخورة ببنتي"