حورية فرغلي تنهار باكية خلال حديثها مع "القاهرة 24": "شكلي اتغير بس من الحادثة.. وماعملتش عمليات تجميل" (تسجيل صوتى)
انهارت الفنانة حورية فرغلي بالبكاء، بعد الحالة التي وصلت إليها من الوحدة وتغيير ملامح وجهها بسبب العمليات الجراحية التي خضعت لها بعد "كسر هيكل أنفها".
وأعربت حورية، عن استيائها من الوضع الذي آلت إليه خلال حديثها مع "القاهرة 24"، وقالت: "أنا مستنية بقالي سنة السفارة تفتح وقاعدة في البيت بسبب كورونا، ومحبوسة بقالي سنة، لا بطلع برا البيت ولا بشوف حد ولا حتى ببص لنفسي في المراية، الدكتور الخاص بي في أمريكا وهو الدكتور الوحيد اللي في العالم عارف تشخيص حالتي ويعرف يعالجني، دا بشهادة أكبر دكتور في مصر".
وأردفت: "المشكلة مش مشكلة شكل، أنا بقالي سنتين لا بستطعم أكل ولا بشم ريحة يعني لو حصل حريقة في البيت مش هعرف اشم ريحة الشياط حتى، عمليتي معقدة جدًا، المفروض دي العملية رقم 10، والمفروض إنها تكون آخر عملية، أنا معنديش أنف أصلًا، الحصان وقع فوق وشي، فمناخيري بقيت عاملة زي الباودر، مفيش هيكل أساسًا للأنف، والحادثة من 10 سنين".
وتابعت: "لو صادفت المراية بفضل أقول دي مش أنا، أنا كل شوية بقول إن كورونا هتخف والسفارة هتفتح وهسافر بقالي سنة على الوضع دا"، مشيرة إلى أنها تعرضت للعديد من الانتقادات بعد فيلم "استدعاء ولي عمرو" على أنفها، منها: "كفاية بقى بقيتي مسخ، اقعدي في البيت، شكلك بقى مقرف، وأنا بنت بردو وبتأثر، ولكن أكيد مش هستجيب ليهم بس لازم أعمل العملية على الأقل عشان أعرف أنا باكل إيه سيبك من الشكل، أنا مش شامه ريحه خالص، بجد محدش كان عارفه قيمة الحاستين دول".
وأضافت: "أكتر حاجة مضيقاني هو إن الناس فاكرة إنها عملية تجميل هو مش تجميل والله، تجميل ليه، منا كنت في كلمني شكرًا مكنش فيه تجميل وكان شكلي عادي، هو شكلي اتغير بس من الحادثة دي من 10 سنين، وبعد مملكة الغجر كانت بردو تعليقات الناس على مناخيري، قولت أنا مش هظهر لحد ما أعمل العملية، وبعدت تمامًا بالفعل، ولما عرفوا إنهم هيستنوا اسافر وارجع، كل اللي كنت بشتغل معاهم اختفوا تليفوني مبقاش يرن حتى، ومحدش بيسأل انتي عايشة ولا ميتة".
واختتمت حديثها، قائلةً: "وأقرب واحدة ليا حاليًا هي رانيا محمود ياسين، تقريبًا كل يوم بتكلمني تطمن عليّا، وطبعًا عشان الكورونا كل واحد من أهلي في بيته وبيحافظ على نفسه وأنا عايشه مع كلابي، أنا بقالي 10 شهور مطلعتش برا أوضتي و3 سنين مبصيتش في مرايه، أنا بردو بنت، هو أنا ما اتحبش؟ هو أنا فيا حاجة غلط؟ هو اللي يحبني ويصاحبني لازم يبقى عايز مني حاجة؟ هو أنا صديقة مثلًا دمي تقيل؟ قعدتي وحشة؟ مش جدعة؟ أنا مش بتكلم على أصحابي بس أنا بتكلم على الناس اللي اشتغلت معاها سنين".
تزوجت عرفي من ثري عربي سرًا.. حورية فرغلي تحتفل بعيد ميلادها الـ42 (فيديو)
1382 جنيهًا إيرادات فيلم “استدعاء ولي عمرو” لحورية فرغلي ومحمد عز ليلة أمس
