"خضير" بطل "لن أعيش في جلباب أبي": ابتعدت عن الفن 15 عامًا واتجهت للتسويق العقاري في الخليج "ونفسي أرجع اشتغل تاني" (حوار)
عرفه الجمهور منذ نعومة أظافره، حيث بدأ مشواره الفني عام 1979، وكان حينها لا يتجاوز عمره الـ6 سنوات، إلا أنه استطاع أن يشارك في الكثير من الأعمال الفنية، والوقوف أمام عمالقة كثر من فناني مصر، مثل السندريلا ونور الشريف في "غريب في بيتي"، وواصل النجاحات والمشاركات، حتى قدم دور عمره وهي شخصية "خضير"، بمسلسل "لن أعيش في جلباب أبي"، ذلك العمل الذي مازال الجمهور يشاهده ويحرص على متابعته، على الرغم من عرضه منذ 26 عامًا.
مثله كمثل الفنانين الغائبين، انتشرت صورة للفنان مؤمن حسن والشهير بشخصية "خضير" مع عائلته، وبدأ الجمهور يتسائل عن سبب غيابه، فقرر "القاهرة 24" البحث عن مؤمن حسن، الذي سرد لنا سبب الغياب طوال تلك الفترة، بجانب كشف الكثير من كواليس "لن أعيش في جلباب أبي".. وإلى نص الحوار:
في البداية.. حدثنا عن سبب الغياب طوال هذة الفترة الطويلة؟
"سافرت خلال الفترة اللي فاتت لمدة 15 سنة، وكنت في سلطنة عمان، ورجعت مصر من سنتين، والفن الفترة اللي فاتت، حصل فيه تغيرات كتيرة، وبقى عندنا أجيال جديدة من المخرجين، ومش أغلبهم يعرفوا الجيل القديم، ومين بيشتغل ومين مش بيشتغل، ولكن بقالي سنتين بشتغل في شغلي في مجال العقارات والتسويق".
ما الذي دفعك للسفر وترك المجال الفني؟
"في الأول كنت رايح زي أي حد سنتين وراجع، ولكن الوقت امتد للفترة الطويلة دي، وقبل ما أمشي كنت عامل بطولات مطلقة، ولكن بدأت الأعمال اللي بتتعرض عليا، تاخد منحنى تاني، يعني عمل واحد أو عملين في السنة، فكان لازم يبقى عندي طريق تاني وشكل مختلف لحياتي، علشان أقدر أمثل براحتي، وموصلش لحالة بعض الفنانين اللي بيوصلوا إنهم مش لاقيين شغل، أو تعبانين، فمكنش هينفع إني أقعد في البيت ومكونش بعمل حاجة غير التمثيل".
انتشرت لك مع العائلة صورة وانقلب السوشيال ميديا بحثا عنك.. ما كان رد فعلك؟
"حسيت إن اللي عملته في عمري مراحش هدر، وسعيد جدا بردود فعل الناس، لإنهم هما اللي في ضهري، وبيشجعوني، وأكيد هرجع إن شاء الله"، ومبسوط إن الجمهور فاكرني وإني رجعت مصر"
كيف كانت بداية دخولك عالم الفن؟
البداية كانت أيام المدرسة، في مسرح المدرسة، وأختي هي اللي بدأت الأول التمثيل، وكانت رايحة التليفزيون في يوم علشان تصور، ووقتها روحت معاها وشافوني وقالولي تعالى مثل، ومن هنا بدأ المشوار".
حدثنا عن كواليس وقوفك أمام السندريلا بـ"غريب في بيتي"؟
"بالرغم من إني كنت طفل صغير، بس كان عندي موهبة من عند ربنا، ووقتها كان بقالي سنتين بمثل، ومكونتش خايف، وطبعا السندريلا كانت جميلة جدا ولذيذة في التعامل، والجيل القديم كان بيقرب من كل طاقم العمل وبيتعاملوا مع الجميع بكل احترام، ومفيش "الأنا" العالية".
ما الذي تتذكره من كواليس فيلم "غريب في بيتي"؟ "أهم موقف هو إني أهلاوي، وطالع في الفيلم زملكاوي، فكطفل كان عندي تناقض بين اللي بقوله وبين اللي أنا مقتنع بيه وبحبه، وكنت بشعر باستغراب".
مَن رشحك لشخصية "خضير" في "لن أعيش في جلباب أبي"؟
"رُشحت للدور من خلال زوجة المخرج أحمد توفيق، لإن في الفترة دي كنت عامل معاها مسلسل، ورشحتني للدور، ووقتها كنت في الجيش وكنت بصور بصعوبة، علشان كنت بخلص جيش، وكنت بصور في فترة الإجازة، ومحدش كان متوقع النجاح الرهيب ده للمسلسل، ولكن الكواليس كانت كويسة جدا، وكلنا كنا بنحب بعض، وفي مرة كنا هنصور مشهد فيه أكل، وقبل التصوير خلصنا كل الأكل، وإِضطَرَّوا وقتها يشتروا أكل تاني بداله".
جمعك أكثر من عمل مع نور الشريف.. ما الذي تعلمته منه؟
"من الناس الي أنا اشتغلت معاهم كتير، وكان بيحبني على المستوى الشخصي، وكان بيروح قبل التصوير، بساعتين، وكنت بروح ألاقيه بيقرأ كتاب أو مسرحية، وكان بيقولي دايما لازم تصفي ذهنك تماما علشان تعرف تمثل، واتعلمت منه الاتقان".
هل مازلت على تواصل مع أبطال "لن أعيش في جلباب أبي" مثل عبلة كامل؟
"بقالي سنتين بحاول أجمع كل علاقاتي القديمة بالناس، ولكن مفيش تواصل مابيني وبين عبلة كامل وحنان ترك، لكن على تواصل مع منال سلامة".
على الرغم من مرور 26 عاما على عرض المسلسل إلا إن مشهد فرح "سنية" مازال يتصدر المشهد.. احكِ لنا عن كواليسه؟
"قعدنا نصور يوم كامل علشان المشهد ده، وكل ردود فعلنا كانت طبيعية وارتجالية، وكنا ميتين من الضحك، واستاذة سهير الباروني، كانت سبب رئيسي في البهجة والروح اللي الناس شافتها على الشاشة".
هل هناك موقف بعينه لا تنساه للفنانة سهير الباروني؟
"كنت مرتبط بيها جدا، لدرجة إني كنت بروح أجيبها من البيت ونروح اللوكيشن سوا، وبعدين أرجع أوصلها من اللوكيشن للبيت، ودايما كنا بنقعد نهزر ونراجع المشاهد سوا".
كيف يكون رد فعل أولادك حينما يشاهدونك في التليفزيون.. وهل هناك ميول لأحدهم لدخول التمثيل؟
"سما ومريم وعمر وغزل، مش بيبقوا مستوعبين، وبيفضلوا يقولولي "هو أنت فعلا مشهور؟"، وبيكونوا مبسوطين وفخورين، ومعنديش مشكلة إن حد فيهم يدخل عالم التمثيل، بشرط إن التعليم ميتأسرش، وهو ده شرطي الأساسي، وبالفعل "غزل" عندها ميول للفن، و"عمر" ميوله كروية أكتر".
هل ما زال الجمهور يتذكرك حينما يقابلونك في الشارع وما التعليقات التي تتلقاها؟
"طبعا بيكونوا فاكرين أنا مين، ودايما بيسألوني: أنت فين؟ مش بتشتغل ليه؟، هنشوفك إمتى؟، وأكتر دور بيفتكروني بيه هو "خضير"، لكن في الخليج الناس بتفتكرلي أكتر المسلسلات الدينية اللي قدمتها".
لماذا لا يعرض عليك أعمال فنية في الوقت الحالي؟
"في عذر لشركات الإنتاج، وهو إني مش موجود بقالي 15 سنة، ولكن أنا متأكد إنه من خلال السوشيال ميديا الناس هترجع تاخد بالها تاني".
من وجهة نظرك.. راضٍ عن التقدير الذي نلته حتى الآن على ما قدمته في الفن؟
"الإنسان دايما بيكون عايز الأكتر، ولكن أنا مع نفسي سعيد جدا بالتكريم اللي شوفته من الجمهور، وإني اشتغلت مع عمالقة الفن، ولكن أنا محستش التكريم ده من البلد، وليه على هامش مهرجانات السينما منستدعيش الناس اللي كانت مختفية ورجعت، ودي مسألة مش وجعاني، ولكن نفسي ده يحصل، واللي نفسي فيه أكتر، هو إني أرجع لبيتي وهو التليفزيون المصري وأرجع اشتغل تاني".
"لن أعيش في جلباب أبي".. في ذكرى ميلاده تعرف أبرز محطات إحسان عبد القدوس الفنية
عاجل.. الفنانة الكبيرة عبلة كامل تُصارع السرطان في مرحلته الأخيرة (خاص)
