خبير أمن معلومات يوضح الفارق بين "واتساب" و"سيجنال" في الحفاظ على الخصوصية
كشف خبير أمن المعلومات، إبراهيم حجازي، الفوارق بين تطبيقي واتساب وسيجنال من حيث الخصوصية والأمان، مؤكدًا أن سيجنال أكثر أمانًا وحفاظًا على خصوصية مستخدميه من تطبيق واتساب.
وأوضح حجازي، أن تطبيق سيجنال يتميز بطريقة تشفير تمنع من التجسس عليه والاطلاع على محادثات وبيانات المستخدمين، متابعًا: "اللي عامل أبلكيشن Signal اسمه Moxie Marlinspike وده قابلته في أوكرانيا في مؤتمر خاص بأمن المعلومات في 2018، وكان وقتها بيقدم سيشن بيشرح فيها ليه Signal هو أكثر أمان من أي أبلكيشن تواصل تاني. بعد السيشن اتكلمت معاه شوية حلوين عن ازاي بيكسبوا طالما هما جهة غير ربحية وشوية تفاصيل تقنية تانية أقدر وأنا مطمن أقول بناء على التفاصيل التقنية دي إنه فعليا آمن جدا عن أي تطبيق تاني".
واستطرد: "خلينا نشوف الناس التانيه قالت إيه عنه: إدوارد سنودن اللي هو أكتر واحد تقريبا مطلوب القبض عليه من أمريكا، واللي اشتغل سنين في المخابرات الأمريكية وتحديدا في عمليات التجسس الإلكتروني، بينصح الناس إنها تستخدم أبلكيشن Signal لأنه بيوفر له الأمان وان محدش يقدر يتجسس علي محادثاته. خبير التشفير العالمي Bruce Schneier بيقول إنه مبيستخدمش غيره وده نظرا لطريقة التشفير اللي بيستخدمها، أهداف الشركة اللي عاملاه واللي هي غير ربحية، وكمان طريقة مراجعة الكود الخاص بالتطبيق واللي بتطمن أي حد تقني بانه خالي من أي عمليات اختراق للخصوصية. ف Signal مش بتعاملك إنك منتج ولا عايزين يكسبو منك أي فلوس عشان كده مفيش إعلانات ولا مشاركة بيانات والتشفير أعلى من أي أبلكيشن تاني".
وعن طريقة الاستمرار في استخدام تطبيق واتساب بطريقة آمنة بقدر الإمكان، أوضح أنه يجب منع وصول التطبيق لعدة مهام من خلال الإعدادات، مثل منع الوصول إلى الكاميرا والميكرفون والصور وغيرها، واستخدام ذلك عند الضرورة فقط.
وواصل: "من تجربتي الشخصية من خلال الـ iPhone فهو بيديلك صلاحية إنك تحدد صلاحية الوصول لأي تطبيق. فاللي أنا عامله بشكل شخصي وانا بستخدم الواتساب، باختصار كالتالي:
1- مش مديله صلاحية الوصول للـ Location ولا للكاميرا (لو اتزنقت صور بكاميرة التلفون نفسه وابعتها مش لازم من جوه الأبلكيشن)
2- مش مديله صلاحية الوصول للصور. الأيفون فيه خاصية ممتازة بتخليك تحدد صور معينه فقط اللي يقدر الأبلكيشن يشوفها وتقدر تضيف صورة كل ما تحتاج بس.
3- صلاحية الميكروفون برده معطلها عنه وبشغلها لما بحتاج اسجل voice note فقط.
4- مببعتش أية بيانات حساسة زي الباسوردات والكريديت كارد والصور الشخصية ولا أي مراسلات مهمة بشكل عام على الواتساب. بستخدمه بس للتواصل مع العائلة والصحاب في المواضيع العامة.
5- مبستخدمش ماسنجر وبفتح الفيس بوك من المتصفح عادي.
وأشار إلى أن القلق يظل من اطلاع البرنامج على جهات الاتصال فقط، موضحا أنها "مش حاجة بسيطة" لكن هذه الإجراءات قللت خطر مشاركة البيانات بنسبة كبيرة جدا، وفق قوله.
وذكر أن من بين الجهات غير الربحية مثل ويكيبيديا وشركة موزيلا صاحبة متصفح فايرفوكس، مضيفا أن طرق الربح لهم تعتمد أغلبها على الدعم المادي، والتي يمكن اختصارها في 4 نقط، هي:
private donations
the sale of goods and services
grants from other non-profits
government funding
تغريدة لمؤسس تيسلا ترفع أسهم "سيجنال" 1000% والشركة ترد بمفاجأة
