المخرج مرقس عادل ينتصر في مواجهة "كورونا".. وينقل لمتابعيه تجربة صعبة استمرت "20 يومًا"
أعلن المخرج مرقس عادل تحسن حالته الصحية بعد إصابته بفيروس كورونا، وخروجه من المستشفى، متحدثًا عن أهم الدروس التي استفاد بها منذ فترة مكوثه بالمشفى وخوضه تجربة الفيروس.
وكتب مرقس عبر حسابه الشخصي على موقع التواصل الاجتماعي "فيسبوك": "الحمد لله أنا خرجت من المستشفى من كام يوم و في البيت لسه على جهاز الأكسجين بس نشكر ربنا، الموضوع كان كبير معايا حبتين أنا كنت من الـ 20٪ اللي بيحتاجوا رعاية طبية مش كل الناس كده متقلقوش، بس خلو بالكم، أولًا أنا فرحان أوي بالتجربة دي لحد آخرها".
وأردف: "محبتكم وقلقكم عليا عندي كبير أوي واحد واحد وواحدة واحدة شكرًا من كل قلبي حقيقي على المحبة أغلى شيء في الحياة وأنقي مشاعر هي المحبة، ثانيًا التجربة بتعلم كتير أوي وبتغير وبتعيد ترتيب الأولويات وبتفرق في عمرك وبتغير منظورك للحياة بكل تفاصيلها وخصوصًا في الناس بتقَدر وبتتعلم وبترتب".
وتابع: "ثالثًا الموت قريب جدًا، السن مبيفرقش ولا الصحةً، وأنا في العناية خرج جنبي 6 أشخاص وحالات متوفين أهاليهم كانو بيزوروهم في الزيارة مع أهلي، وفيهم حالات كانت أقل من حالتي، الأحباب هم الباقيين ركزوا معاهم أوي، الألم والوجع اللي مريت بيهم 14 يوم رعاية والأكسجين مش بيتحسن كان فيهم مفاهيم كتير".
وأضاف: "رابعًا أنا آسف آسف لكل حد زعلان مني، آسف لو حد ضايقته وأنا مش واخد بالي، أو واخد وكنت عنيد، آسف لو مقدرتش أكون أحسن في بعض المواقف، أنا من دلوقتي مش زعلان لأن الحياة متستاهلش، ولو في صراعات وهجوم أنا مش زعلان ولو حد بيتخانق على شغلانة صدقني مش مستاهلة أنا من انهارده مش زعلان من حد وآسف لكل حد فرحان بكل محب حقيقي".
واستكمل: "خامسًا أوعدكم بكره بمنظور مختلف ومشاريع جديدة أفضل، يمكن أنا أحاول ابقي إنسان أفضل وكفنان أكون متطور برؤية جديدة وأعمال جديدة، هنا بقى أرجوكم تدعولي إن ده يتحقق وتساعدوني على ده، شكرًا لحضراتكم وأكرر أنا فرحان أوي بمحبتكم اللي حَلّتْ الألم والوجع والفترة الصعبة، هاتلي يا بكره صفحة جديدة وأخيرًا و ليس آخرًا، أمي وأختي وخالي وأهلي كلكم، شكرًا لا تكفي كل اللي أنتم قدمتوه من تضحيات ووقت ومحبة أنا بحبكم وممتن و بشكركم من كل قلبي".
أبرزهم مرقس عادل وتامر حمزة.. 4مخرجين سنة أولى رمضان 2020 (فيديو)
بعد نجاح مسلسل “فرصة تانية”.. المخرج مرقس عادل يتألق في افتتاح مهرجان الجونة (صور)
