دعاء عامر عن عبلة الكحلاوي: "كانت مستعدة تقابل ربنا.. ويا بختها دلوقتي هي الكسبانة" (صورة)

حرصت الإعلامية دعاء عامر، على الدعاء للداعية الراحلة عبلة الكحلاوي، والتي غابت عن عالمنا أول أمس الأحد، عن عمر ناهز الـ72 عاما، متأثرة إصابتها بفيروس كورونا المستجد، وشيعت جنازتها أمس.  

ونشرت دعاء عامر مجموعة من الصور التي تجمعها بعبلة الكحلاوي عبر حسابها الشخصي بموقع الصور والفيديوهات القصيرة "انستجرام"، وعلقت قائلة: "اللهم ارحم ماما عبلة رحمة واسعة أم الناس كلها، وأمي حبيبتي كانت ملاك أنا أعرفها، وعلاقتنا بدأت من أكتر من عشرين سنة، واستمرت لحد دلوقتي".  

وتابعت: "وأشهد بصدقها وبإخلاصها ونقاءها وحنانها، وإن مفيش زيها ولا في طيبتها وجمال قلبها، إحنا اشتغلنا سوا وسافرنا عمرات سوا وعملنا خير كتير سوا، ويارب اجعل كل عملنا في ميزان حسناتنا".

وأضافت: "ماما عبلة على مستوى الدعوة وفي حياتها الشخصية واحد، هي هي، أم كلها عطاء وحب وتسامح وخير، الله يرحمها حبيبتي يا بختها دلوقتي هي الكسبانة، وإن شاء الله في عليين ونحسبها من الشهداء، ودايما بأقول ماما عبلة إنسانة في دعوتها، وفي حياتها حقيقية مية بالمية، مفيش زيها صادقة ومخلصة، وهي كانت حاسة كذا مرة في الأيام الأخيرة، تقولي أنا خلصت رسالتي البركة فيكم وأنا مستعدة أقابل ربنا".

واختتمت حديثها: "إحنا بجد ناخد العبرة، إننا نركز في إننا نعيش بالأخلاق والصفات الحلوة، العطاء والتسامح والحب والخير، علشان نخرج من الدنيا على خير زي ما كانت بتقول، ربنا يخرجنا من الدنيا على خير والله يرحمها، ويرحم أمهاتنا وآباءنا، وأهلنا وأحبابنا، ويرحمنا كلنا دنيا وآخرة، واللهم أحسن خاتمتنا جميعا يارب".

"لمّلم تراب القبر وقرأ عليه بنفسه".. الحبيب الجفري يودع عبلة الكحلاوي بطريقة مؤثرة (صور)

"بين بكاء ودعاء ووداع".. 20 صورة مؤثرة من جنازة عبلة الكحلاوي