دنيا عبد العزيز: "في عزاء والدتي كنت متخيلة إني بصور مشهد"

حلت أمس الفنانة دنيا عبد العزيز، ضيفة ببرنامج "مساء DMC" للإعلامي رامي رضوان، المذاع على قناة DMC، وتحدثت عن أعمالها المقبلة، التي من المقرر أن تشارك بها في الموسم الرمضاني المقبل 2021، بجانب حديثها عن والدتها.

وقالت الفنانة دنيا عبد العزيز: "فكرت مشتغلش شوية بسبب وفاة والدتي والموضوع مكنش مجرد قرار، ولكن أنا كنت بشتغل عشان هي هاتتفرج عليا، وكانت أول واحدة بتشوفني، وكل حاجة في راسي توقفت تماما، ومكنتش عاوزة أي حد يحتك بيا، ومبقاش في حاجة فارقة بالنسبة ليا، وما زالت الحاجات دى موجودة ولكن شوية حاجات اتظبطت خلتني ارجع اشتغل تانى شوية".

وتابعت: "إلهام شاهين كانت وما زالت، أكثر فنانة دعمتني من وقت تعب والدتي مش الوفاة بس، ومفيش كلام يتقال عنها، ومش هاقدر أنسى كل حاجة عملتها، وهي من أكتر الناس اللى حست بيا، ومش بس عشان جدعة، ولكن لأن كمان مرت بنفس ظروفي لأنها كانت مرتبطة بوالدتها جدا".

واستكملت: "ولكن في العموم، أنا لم يكون في بالي تماما مين واقف جنبي أو مين لا، لأن فعليا دماغي مكنتش موجودة فيا، وحتى توقيت العزاء كنت متخيلة إني بصور مشهد عزاء، وأن اللى بيحصل ده مش جد، وكتر خير اللي حضروا ووقفوا جنبي وما زالوا حتى اليوم، وأغلب الفنانين اللي حضروا العزاء، هما أصدقاء والدتي من قبل ماتتجوز، ومجوش عشان دنيا ولكن حضروا عشان بيحبوها جدا".

لهذا السبب.. بكت دنيا عبد العزيز كثيرًا في لوكيشن تصوير البرنس