شريف مدكور: درست اليوجا لأركز خلال الصلاة.. ولا أشعر بالخشوع في المسجد
أوضح الإعلامي شريف مدكور الطريقة التي يؤدي بها شعائر الصلاة، مشيرا إلى أنه يعظم تلك الشعيرة، ويفضل تأديتها بفرده حتى يصل للخشوع التام، رافضا الصلاة في المساجد، مما وضعه في محل انتقادات من البعض.
ورد شريف مدكور على تلك الانتقادات، في فيديو نشره عبر حسابه الشخصي بموقع الصور والفيديوهات القصيرة “انستجرام”، وقال: “في ناس هاجمتني بس مش فارق معايا أنا بستفتي قلبي، والدين اللي أنا فاهمه ما قاليش إني يبقى في وسيط بيني وبين ربنا، وأنا درست اليوجا علشان أركز في الصلاة، لإني مخي دايمًا كان بيبقى مشتت في أكتر من حاجة، وده مش صح في الصلاة، وأنا مش بقول لحد يعمل زيي وكل واحد حر، أنا ساعات بصلي في الجامع وبروح الكعبة لما بروح العمرة، ووقتها ربنا بينزل عليا نعمة إني لما بدخل الأماكن دي بفصل عن الدنيا وبكون مش سامع حاجة غير نفسي ودعائي”.
وتابع: “طب أنا بعمل ايه علشان أصلي، أنا زي ما بتوضى بكون مهيأ جسمانيا وروحيا للصلاة، وده شء مهم في الصلاة، وأغلب صلواتي بصليها في بيتي ،ولما بكون في الاستديو بصلي في الغرفة بتاعتي، وفي الجامع مش بيجيلي الخشوع، والناس بتكون بتعمل دوشة حتى وقت الصلاة، وأنا بكون عايز أركز وأخلق علاقة ما بيني وبين ربنا، بكون عايز أعمل علاقة ما بيني وبين ربنا والسما، ،والصلاة أهم فرض في حياتي وفي حياة أي مسلم، ووقت الصلاة عقلي بيكون ممسوح، وربنا رازقني إني بيتي هادئ جدا، وأوقات بصلي في الروف أو الجنينة في البيت خاصة في الصيف”.
طريقة شريف مدكور في الصلاة
وأضاف: “بعد ما أخلص الصلاة بحب أقرأ آية الكرسي أو آخر آيتين في سورة البقرة، وبمجرد ما بخلص الصلاة بكون رجعت الدنيا لإني وقت الصلاة بكون خارج الدنيا، ودي هي الطريقة اللي بصلي بيها، واللي أنا مقتنع بيها، واللي من غير ما تكون في القرآن أو في السنة، لكن هي منطقية لإن ربنا قالي استفتي قلبك، وقالي أقرأ وأنا لما طبقت ده وصلت للنوع ده من الخشوع والإيمان”.
وأردف: “في ناس بيصعبوا عليا من الطريقة اللي بيصلوا بيها، لإن ربنا مقلناش نصلي زي الإنسان الآلي، وإحنا وقت الصلاة بنطير وبنرجع”.
واختتم حديثه مطالبا الجمهور بعدم مهاجمته، قائلا: “الدين الاسلامي بتاعنا مفيهوش زعيق وده دين هدوء وسلام ، وأنا في رمضان عمري ما صليت التراويح في المسجد، ولكن دايما في البيت ولوحدي مع ربي والقرآن”.
بسبب ملصقات على سيارته.. شريف مدكور يطالب بالتحقيق مع ثروت سويلم عضو مجلس النواب (صور)
لينا شاكر: "لما عرفت إني مصابة بالسرطان كلمت شريف مدكور قولتله بقينا مكنسرين زي بعض"
