بولا وجيه يكتب: مش مجرد كلمة!
بولا وجيه يكتب: مش مجرد كلمة!
قال: "كلامهم كان بيبقى زي الرصاص، وأنا قلبي مكانش عنده واقي ضده!"
ساعتها سكت وبصيت له وافتكرت مواقف كتير يمكن مريت بيها على مدار سنين عمري المختلفة، بين النعت بالفشل، بين النعت بكل صفات التخن، وبين حتى متلازمة مشيتي الغير متساوية من بعد عملية رجليا.
افتكرت لما كنت لسة طفل عنده 6 سنين واتقال لي من مُدرسة العربي في المدرسة: "أدي دقني لو فلحت يا فاشل في الإملاء" مش قادر أنسى وقت ما خرج أول كتاب كبير ليا من المطبعة -7 برمهات- لما كان نفسي أجري عليها وأقولها أني مش بس فلحت!، لأ!، ده أنا كمان بقى ليا كتب.
افتكرت ميس العلوم اللي قالتلي في 3 اعدادي مش هتفلح وبعدها دخلت كلية طب، ومازلت بحاول أثبت أني قد التحدي وقد الحياة.
لكن يمكن الكلمة اللي فضلت معلمة جوايا أغلب الوقت، لما جراح عظام كبير قال لوالدتي زمان: "أنا مش هقدر أعمل له حاجة!، كلها شهور ويتشل.. ويمكن سنين قليلة جداً ويحصل ضمور كلي في جسمه ويموت!".
في الكتاب المقدس، كان فيه آية بتقول: "الموت والحياة في يد اللسان"، لأن ساعات اللسان فعلاً ممكن يقتل، وممكن يقوي، ممكن يساعد حد ضعيف بأنه يكسب ثقة في نفسه فيتقوى ويتحدى ويعافر لحد ما فعلاً يوصل لحاجة مهمة، وممكن تقتل حد شجاع أو على الأقل بيحلم بحاجة في حياته.
الكلمة في أصلها ممكن متاخدش ثواني، لكن تأثيرها ممكن يدوم لعمر، ممكن كلمة في وسط هزار تقتل حد لوحده بليل، تحاوطه بهالة من التفكير وتحاوطه بهالة من الحزن، وممكن جملة تبقى حروفها يدوب عشرة، تهد جبال من حلاوتها.
"أنا واثق فيك"، 10 حروف كانوا كفيلين اعدي في حاجات كتير واجهتها، "انا معاك"، 7 حروف كانت بتشجعني لما اسمعها من والدي قبل أي تجربة بدخل عليها.
تصدق لو قولتلك أن مش مطلوب منك لما حد بيشتكي لك أنك تشيل معاه أو تفكرله، قد ما بيكون مطلوب منك تحسسه بس أنك حاسس بيه وبتشاركه وجدانياً من غير أي حاجة تانية؟.
مش هتخسر حاجة لو دوقت كلامك قبل ما تقوله، مش هتخسر حاجة لو اخترت الكلمة الصح اللي بتبني مبتهدش، أحياناً كلامنا بيكون الطوب اللي بنبني بيه حواجز بينا وبين اللي بنحبهم من غير ما ناخد بالنا.
بيكون هو الوسيلة والطريقة اللي تباعد بينا، من غير ما نفكر أو نعرف أننا اللي اخترنا الوسيلة دي، وكأن البعد بيبقى سهل فبنقدم وسايل علشان يتحقق.
قبل ما تخسر الناس بكلامك، أعرف أنك هتخسر نفسك قبلهم، لأن في كل كلمة بتخرج منك، هتئذيك قبل ما تئذي غيرك، وافتكر أن مفتاح الحياة، جايز يكون في كلمة، زي ما مفتاح الموت برضه بيكون في كلمة.
