عفاف رشاد بعد تصدرها التريند: "عفاف شعيب هي من ألحت علي أعمل ميكب وشعري وسمعت كلامها"
علقت الفنانة عفاف رشاد على الجدل المثار حول ظهورها الأخير، بعد تداول صورة لها بملامح شبابية، جعلتها تبدو أصغر في السن، وقالت: "كل اللي حصل أني عملت زي كل الناس، غيرت صورة البروفايل على الفيس بوك وحطيت صورة تانية، وعشان الفنانة عفاف شعيب جارتي وقريبة مني وصديقتي، كانت دائما تقولي إعملي شعرك، وحطي ميكب، ومتقوليش سنك الحقيقي".
وتابعت في مداخلة هاتفية عبر برنامج "كلمة أخيرة"، الذي تقدمه الإعلامية لميس الحديدي على شاشة "ON" قائلة : "لما قلتلي كده قلتلها أنا بعمل دور أم كتير، والمصداقية لازم أظهر بشكل يليق بدور الأم وسنها، في النهاية سمعت كلامها ورحت الكوافير تحت البيت وعملت شعري زي ما قالت، ولما جه الكوافير يعمل الصبغة قلتله مش هتبقى لايقة علي، قالي لا هتليق على بشرتك، لإنك بولندية، وعملتها ".
وأضافت: "بعد ما خلصت عندي جارة مغربية شاطرة في الميكب اب، قالتلي تعالي أعملك شوية ميكب، وعملتلي وبعدين صورني يوسف الفنجري صاحب إبني، أما عجبتني الصورة قلت أحطها على الفيس بوك وحطيتها ونمت وفوجئت بالي حصل".
واستكملت: "وأنا ملياش خبرة في السوشيال ميديا أصلا، ولا عمري فكرت أعمل شهرة لنفسي ولا ألفت نظر الناس لي، فجأة لقيت الدنيا اتقلبت، والناس بتقولي أنت تريند،ى إتخضيت وخفت وقلت أنا ست في حالي ومعايا إبني أنا عملت إيه بس؟، إتخضيت وإترعبت لأني معرفش يعني إيه تريند، مفرحتش أوي من كتر التعليقات السلبية على الصورة، وإبني جراح في القصر العيني اسمه عمر السبكي، قالي ذنبي ايه ياماما اسمع الكلام ده كله؟ لأن الناس قالت إني عملت كده بفلوس محمد السبكي، رغم إننا منفلصين عن بعض وعمر سنه سنتين، والآن يبلغ 30 عاما وعلاقتنا كويسة أنل وإبنه".
وأكملت: "أنا بحط على وشي حاجات بسيطة في البيت زي الزبادي والجلسرين والليمون وماسكات، وماعملتش بوتوكس، وسر جمالي إن ربنا حب يجبر بخاطري، فصحيت لقيت كل الناس بتتكلم عني وحب يطبطب علي بكدة، لأني نمت وقمت لقيت كل الناس بتجيب في سيرتي، ربنا طبطب علي في اللحظة دي، وكنت محتاجة طبطبة منه ".
وحول تشبيهها بجنيفر لوبيز قالت : "هو أنا أطول، وردا على ما تم تداوله حول دعوة الناس لخلع الحجاب، قالت : "قالوا أني قلت شيلوا الحجاب، لأنه بيعمل صداع، أنا هقول كدة ليه بس؟ أنا حجيت في 2008 وفي 2014، وأنا ست مريضة بالصداع وقلعته عشان تعبانة، فوجئت بالناس بتقلي الحجاب بريء منك ربنا ينتقم منك وهيدخلك النار".
