مشرفة تمريض بحميات إمبابة: "أهالي المنطقة كانوا بيقولوا هتجيبلنا الوباء" (فيديو)
قالت فتحية هلال، مشرفة تمريض بمستشفى حميات إمبابة، إنها كانت خائفة عندما بدأت أزمة انتشار فيروس كورونا المستجد، لكن جرى تدريب هيئة التمريض وفق خطة، وهو ما شجع الجميع، بالإضافة إلى التشديد على اتخاذ الإجراءات الاحترازية وارتداء الكمامات: «بعد ما اتطمننا مبقيناش نخاف من المرضى، والمستشفى وفر لنا كل حاجة».
وأضافت هلال، في مداخلة هاتفية ببرنامج «صباح الخير يا مصر»، الذي يعرض عبر القناة الأولى، والفضائية المصرية، وتقدمه الإعلامية هدير أبو زيد والإعلامي محمد الشاذلي: «أقارب المرضى لما بيزوروهم بيبقوا مش عاوزين يشوفوهم وخايفين منهم وبيكشوا، ونتعامل المرضى بشكل جيد للغاية».
وتابعت مشرفة تمريض بمستشفى حميات إمبابة: «بنشوفهم لو محتاجين حاجة، وخاصة في الأكسجين، وحريصين على عدم حدوث أي تقصير، ونعمل بلا خوف، وبنقول للناس إن كورونا زيه زي البرد، ولازم نبعد عن التراب ومفيش أي خطورة منه عشان نطمن الناس ونهديهم لأن الناس كانوا بيبقوا خايفين».
وأوضحت أن أهالي المنطقة التي تقطن فيها كانوا خائفين منها بسبب طبيعة عملها، وكانوا يعتقدون أنها ستنقل العدوى لهم في أي لحظة: «في منطقتي، كانوا بيقولوا إني شغالة في مستشفى وهجيب لهم الوباء، لكنهم مبقوش يخافوا من أي حاجة بعد كده، ولما كانوا خايفين كنت بتضايق لأني كنت بعملهم أي خدمة، لكن ليه يخافوا مني، المرض بتاع ربنا، ولما كنت بكح كانوا بيقولوا لي انتي جيبتي الوباء معاكِ ولا لأ، وعموما منعت الزيارات وأسرتي متفهمة الدنيا ومفيش أي مشاكل».
