عيد الأم.. بدرية طلبة للشباب: "على قد ماتقدر استمتع بوالدتك واحضنها" (خاص)
وجهت الفنانة بدرية طلبة نصيحة للشباب بمناسبة عيد الأم، الذي يوافق اليوم الأحد 21 مارس، حرصت من خلالها على حثهم على حُسن التعامل مع أمهاتهم وبرهن، كما هنأت جميع الأمهات بهذا اليوم.
وتحدثت بدرية عن والدتها في تصريح خاص لـ "القاهرة 24" قائلة: "سرحانة في وش أمي، ريحتها الجميلة في مناخيري لحد دلوقتي، لما كانت بتاخدني في حضنها، ولا لما تجري على المطبخ تعملي الأكل، لسه فاكرة فرحتها وهي بتستقبلني لما أرجع من شغلي".
وتابعت: "مش لاقية كلام أقوله عن أمي، اللي جوايا ميتبرمجش لكلام، اللي جوايا احساس جميل أوي، وبشوف رسايل بناتي وأنا قاعدة بعد يوم تعب في الشغل بفرح.. إحساس جميل أوي إحساس الأمومة".
وتوجهت بدرية طلبة بنصيحة للشباب قائلة: "على قد ماتقدر استمتع بأمك احضنها بوسها طبطب عليها، اتحقق من ملامحها استمتع بيها، وشم ريحتها، خلى ريحتها في مناخيرك متروحش، دا اللي أنا عايشة بيه دلوقتي".
بدرية طلبه
وتابعت: "خدوا بالكم من أمهاتكم على قد ما تقدروا، أسعدوهم وطبطبوا عليهم، حتى لو والدتك مش بتشتغل وست بيت فقط، فهى بتشقى وتتعب علشان أنت ترتاح".
وتحدثت بدرية في تصريح خاص لـ"القاهرة 24"عن أجواء احتفالها بعيد الأم مع بناتها قائلةً: "بحتفل بيه في الغربة وأنا بصور مسلسل، علشان أرجعلهم مجبورة وأعملهم اللي نفسهم فيه، بشقى وأتعب علشان أخلى ولادي في أحسن حاجة في الدنيا، مش بحتفل بيه معاهم واحنا بناكل تورتة".
وتابعت: "بحتفل بيه وأنا شايفة الفرحة في عيونهم، وهما بيفتخروا بأمهم، اللي لما تروح تسيبلهم ذكرى كويسة، ودي أحسن حاجة أننا نسيبلهم ذكرى طيبة يفتخروا بيها، بشوف رسايل حلوة من بناتي وأنا في شغلي، ربنا أكرمني ببنتين والبنات معروفين بحنيتهم.. بيطمنوا عليا أول بأول".
بدرية طلبة: "بحتفل بعيد الأم في الغربة.. بشقى وأتعب علشان أرجع مجبورة"(خاص)
