أول تعليق من فتاة ميت غمر بعد براءة المتهمين في قضية التحرش وهتك عرضها
نشر حساب منسوب لفتاة تدعى "بسنت" والمعروفة إعلاميًّا بـ"فتاة ميت غمر"، على صفحتها الشخصية بموقع التواصل الاجتماعي "فيس بوك"، تتظلم فيه من براءة المتهمين في واقعة التعدي عليها خلال ديسمبر الماضي.
وقالت بسنت في التدوينة "طول الوقت اللي فات فضّلت عدم الظهور وانتظار نتائج المسار القانوني لقضيتي، وهي هتك عرض وتحرش جنسي جماعي من قبل 7 أشخاص بمدينة ميت غمر، على أمل إن حقي يرجع في واقعة تم تسجيلها على كاميرات المراقبة في المنطقة، والنتيجة أخدوا براءة".
وأضافت بسنت، "4 شهور وأنا منتظرة حقي يرجع لي، خلالهم تم تهديدي أكثر من مرة بالقتل والتشويه والاغتصاب، تم التشهير بيَّ وبحياتي واستخدام صوري الشخصية اللي كانت موجودة على حساب شخصي وبرايفت، تم الضغط عليّ، ومحاولات لمساومتي أكتر من مرة على فلوس، علشان أتنازل عن القضية، تم ابتزازي من خلال محاولة تحرير محامي المتهمين قضية كيدية ضدي، تم نبذي من المكان اللي عشت فيه طول عمري وكنت ومازلت خايفة أروح بيت أهلي".
وتابعت بسنت، "4 شهور وأنا مش حاسة غير بمشاعر رعب وقلق وظلم وإهانة، مش عارفة أفكر في حاجة غير الحادثة، حتى وأنا نايمة بحلم بالحادثة، حياتي واقفة تمامًا، مش عارفة أفكر، مش عارفة أنام، بخاف وأنا خارجة الشارع، بخاف وأنا قاعدة في بيتي ومش حاسة إن في أي مكان في الدنيا ممكن يبقى آمن عليا مرة تانية، مش عارفة أتعامل مع آلامي النفسية واللي نتج عنها آلام جسدية" .
وأضافت “رغم كل محاولات الضغط عليا للتنازل رفضت وقررت أكمل في القضية، قررت أتجاهل كل الأصوات وأستجيب لنداء النيابة العامة، بأن الست اللي تتعرض لانتهاك تروح تبلغ وحقها هيرجعلها، طب أنا أهو بلغت واستحملت كل تبعات قراري ودفعت تمن بلاغي تشهير وتهديد ووصم وإهانة، واللي كان مصبرني على ده إن في الآخر القانون ينصفني ويرجع لي حقي، ويرد لي ولو جزء من كرامتي اللي اتهانت وعرضي اللي انتهك، وبعد كل ده في تاني جلسة لمحاكمة اللي انتهكوني أخدوا براءة، وحاليا محامي المتهمين بيهدد بمقاضاتي”.
وأوضحت “أنا عايزة مسؤول يرد عليا ويفهمني دي رسالة معناها ايه! لما تدوني الأمان آجي أبلغ وأتحمل لوحدي تبعات كل ده وأدفع تمنه من روحي وأماني، وفي الآخر المتهمين اللي متصورين وهما بيعتدوا عليا ياخدوا براءة! فإيه الرسالة اللي عايزين توصلوها للستات اللي بيتم انتهاكهم؟ وإيه الرسالة اللي عايزين توصلوها لكل مجرم متحرش/ معتدي/ مغتصب؟”.
وأضافت “أنا مش حاسة دلوقتي غير بالقهر والغضب، وخايفة مشاعري تتحول لندم، خايفة أندم إني اتكلمت، إني طلبت حقي، إني صدقت إن فيه أمل، خايفة أندم إني كملت في القضية واعتبرت تنازلي عن حقي هو تنازل عن حق كل ست تم انتهاكها زيي لأني كنت دايمًا بقول إني مش هتنازل ومش هسمح للمجرمين دول يمشوا ينتهكوا ستات تانية، كنت بقول إني مش هتنازل علشان لما حقي يرجعلي أكون بدي أمل لستات تانية تبلّغ زيي وماتسكتش عن حقها، بس دلوقتي حقي راح، حقي وحق كل ست هتتأذي في المستقبل من الرجالة اللي أذوني أو رجالة غيرهم شافوا إن عادي ممكن ننتهك عرض واحدة ست في الشارع والكاميرات تصورنا وبردو نطلع براءة!”.
وتابعت “أنا دلوقتي ظهرت وبكتب علشان مبقاش عندي حلول تانية، وعلشان يتم الطعن على الحكم لازم النائب العام هو اللي يطعن، فأنا دلوقتي بطالب النائب العام بالتدخل والطعن على الحكم اللي ضيع حقي وده أبسط حقوقي كست وكمواطنة تم انتهاكها في الشارع في حادثة الكاميرات صورتها، بطالب كل مسؤول عنده القدرة على مساعدتي يتدخل ويساعدني، بطالب أي حد يقدر يوصل صوتي يعمل ده، وأي حد يقدر يشارك البوست ده ويدون على هاشتاج #حق بسنت فين يعمل كده ويساعدني”.
