دفع ثمن الشهامة.. مقتل شاب بسبب دفاعه عن أحد الأشخاص في مشاجرة (فيديو)
شهد شارع القاضي بمنطقة شبرا التابعة لدائرة قسم شرطة شبرا مصر، مصرع شاب، خلال مشاجرة نشبت بينه وبين عدد من الأشخاص القاطنين بالشارع، بسبب خلافات بينهم، بعد دفاع المجني عليه عن شخص كان يتشاجر مع هؤلاء الأشخاص.
التقى "القاهرة 24" أسرة المجني عليه وروي شقيقه ويدعى "أحمد عبد الحميد"، تفاصيل الواقعة، قائلًا: "الحكاية بدأت بمشاجرة بعض الأشخاص في المنطقة مع شخص غريب، أخويا بالصدفة واقف أمام المنزل شاهد شخص مصاب بيجري عليه وبيقوله الحقني ودخل البيت عندنا بيستنجد بينا، أخويا وقف الناس وفضل يهدي فيهم لحد ما الشخص التاني هرب وهو مصاب إصابات كبيرة في جسمه، المشكلة تحولت مع أخويا والأشخاص دي قالت لأخويا لو مجبتش الواد هنقتلك أنت، أخويا راح ليهم وصالح الناس، وقالهم أنا بمنع شر والراجل بيستنجد بيا وأنا بحميكم من مشكلة أكبر".
وأضاف شقيق المجني عليه: "صحيت من النوم على صوت إطلاق نار في الشارع وأصوات عالية ببص أشوف في إيه لقيت الأشخاص دي واقفين تحت البيت وبحوزتهم أسلحة نارية، وأسلحة بيضاء، وبينادوا على أخويا انزل يا محمود لو أنت راجل انزل هنقتلك، وبدأوا بالهجوم على المنزل وطلعوا جابوا أخويا من البلكونة وبدأوا بالضرب فوق دماغه وفي جسمه بالأسلحة البيضاء، أخويا نزل جري في الشارع وهو غرقان في دمه والناس كلها في الشارع شاهدة على ذلك وأيضا الكاميرات الموجودة بالشارع سجلت المشاجرة بالكامل".
وتابع: "أنا عايز حق أخويا من البلطجية دول، أنا أخويا كان بيمنع شر وليس له ذنب أنه يموت بالطريقة دي أبدا، أخويا لم يرتكب أي عمل سيئ، ومن حب الناس له لقب بشهيد الشهامة بالمنطقة".
وقالت والدة المجني عليه: "محمود ابني ادبح قدام عيني بعد ما ربيته وعلمته، ناس بلطجية تموته بدون أي وجه حق، ابني كان لسه هيدخل الجيش ولسه مخلص كليته ملحقتش أفرح بيه، أنا بناشد الرئيس يجبلي حقي وبناشد النائب العام وكل العالم أنا قلبي محروق علي ابني وهموت لو حقه مرجعش" .
