تستخدم البامبو في صناعة الأعمال اليدوية.. "شيماء" فتاة كفيفة تبدع بأنامل من ذهب (فيديو)
"نفسي أثبت للناس إن الكفيف يقدر يعمل أي حاجة".. بهذه الكلمات بدأت شيماء محمد عبد القادر، حديثها مع "القاهرة 24"، فهي فتاة كفيفة تستخدم البامبو لصناعة الأعمال اليدوية، لكي تغير ثقافة المجتمع الذي يرى الكفيف "مسكينًا" لا يقدرعلى صناعة شيء.
تخرجت "شيماء" في كلية الآداب، قسم اللغة العربية بجامعة الإسكندرية، وبحثت عن شيء يسليها للتغلب على وقت فراغها:" أنا بحب الأعمال اليدوية، وفي البداية مكنتش أعرف البامبو قبل كدة، وسمعت عن ورشة عمل خاصة به، بعد التخرج حسيت إني عايزة أوصل لهدف، فقررت أحضر الورشة، وأشوف الدنيا فيها إيه، وبعد التجربة ابتديت أتعلمه".
وعن الدعم الذي تلقته، تقول "شيماء": أهلي كانوا بيشجعوني لأي حاجة عايزة أتعلمها، وكانوا بيقولوا لي روحي، ويشجعوني على كل إنجاز بعمله، ولكن الموضوع كان غريب عليا، لأني مكنتش أعرف شكله، ولكن بعد كدة، اتعلمته في وقت قصير، وهو حاجة من الحاجات الممتعة، ومن ثم انضميت لجميعة "دنيتنا"، ومديرتها ساعدتني كتير.
وأضافت: "مدربتي نادية صبورة جدًا معايا، ومكنتش بحس بالتوتر في الشغل، وهي اللي علمتني انتقل من مرحلة لأخرى، لأن في البداية أنا مكنتش متخيلة أني أوصل لدة كله".
ختم القرآن
حلمها تكوين مشروع خاص بها، في البامبو، بالإضافة إلى ختم القرآن الكريم، حيث وصلت للجزء السابع والعشرين: "أنا مولودة كفيفة، وحبيت أحفظ قرآن، فرحت دار تحفيظ عادية، والشيخ قال لبابا إزاي هتحفظ، ولأني معايا مصحف خاص بيا وافق، وحلمي اختم وأكون محفظة قرآن".
وتابعت: "أنا متعودة على حالتي وراضية بيها ومش زعلانة، وفقدان البصر مش مأثر في حياتي، وأي حاجة عايزة أعملها بعملها، وأهلي مشجعيني وبيقولوا لي اعملي اللي عايزاه متوقفيش، ودايما يقولوا لي هاتي تاني واعملي شغلك وانجحي".
وعن أصعب المشاكل التي تواجهها، تضيف:"تفكير الناس مشكلة في حياتي، وبيقولوا لي إزاي كفيفة وبتعملي كدة، أنا بقف قدام البوتوجاز واتعودت على حالتي، وفي مرة كنت بسخن حاجة وفوطة المبطخ لقطت نار، وقدرت أحل المشكلة بدون ما ألجأ لحد، والموقف ده قواني في حياتي".
وأكدت رغبتها في الاستمرار والنجاح، فقالت: "أنا شايفة إن دي حاجة لنفسي، وأنا اللي هستفاد، وأثبت للناس إن الكفيف يقدر يعمل أي حاجة، لو كفيف واحد قدر يعمل حاجة معينة يبقى كل كفيف يقدر يعملها ودي كلمة مُدرستي، اللي بقيت مقتنعة بيها".
وأردفت: "بحب التجربة، لو فشلت مرة في حاجة مقدرش أسيبها، دايمًا بكمل حتى لو خايفة، حتى لو بالتدريج، لحد ما أبقى ممتازة فيها".
