بولا وجيه يكتب: علاقات الـ"one way"
قالت: "أنا كنت بدي دايماً من غير ما استنى مقابل، بس هو أنا ليه مبلاقيش مقابل؟، هو أنا مستاهلش أتحب؟".
العلاقات قايمة في أساسها على فكرة العطاء، والعطاء هنا مش المقصود بيه أن إحنا ندي مشاعر بس، أو خدمات بس، أو احتواء بس، أو حاجة معينة وخلاص، لكن العطاء ككل.
لو رجعنا لسفر التكوين في الكتاب المقدس وبالتحديد للإصحاح الثاني علشان نعرف قصة خلق حواء، هنلاقي إن ربنا خلقها علشان تكون "المعين النظير" لآدم اللي كان موجود في الجنة، لكن كان حزين علشان كان لوحده، وهو شايف كل الكائنات من حواليه ذكر وأنثى إلا هو اللي مفيش "ونس" له.
وجت حواء علشان تكون الونيس والونس لآدم، وتكمله في اللي ناقصه، واتخلقت من ضلعه علشان تعرف إن أساسها جاي منه، فالاتنين يكونوا زي قطع "البازل" بيكملوا بعض، مش يكملوا على بعض.
هو كان محتاج للاحتواء والونس، وهي كانت محتاجة للأمان والحماية، ومحتاجة اللي يحسسها بخوفه عليها وأنه موجود هنا علشان يحميها ويحافظ عليها.
فكرة إن الاتنين بيكملوا بعض فكرة في حد ذاتها ممكن تكون كبيرة، وممكن تبان مش سهلة الفهم، لكن وقت ما الاتنين بيفهموا الأول قبل ما يدخلوا العلاقة، هو إيه اللي ناقصهم وبيدوروا عليه في العلاقة، زي ما بيفهموا هما هيقدموا إيه في العلاقة، بتسهل عليهم حاجات كتيرة بعدين.
لأن هيبقى مفهوم كل طرف بيقدم إيه، ومحتاج لإيه من العلاقة اللي داخل عليها، لأن أساس العلاقات هو الاحتياج، احتياج للونس، احتياج للحب، احتياج للشبع، إن الشخص محتاج لحد يشبعه ميخلهوش محتاج لحد غير الطرف التاني اللي قصاده ده.
لكن السؤال المهم أو اللي لسه موجود قدام كل واحد فيهم، هل فعلاً اللي قدامه ده بيدي له اللي هو محتاجه ومخليه شبعان بيه ولا لا؟، هل فعلاً بيحبه زي ما هو عايز يتحب ولا لا؟.
"جاري شابمان" في كتابه لغات الحب الخمس، كان لخص موضوع تحب اللي قدامك إزاي، إنه قال: "إن لكل واحد فينا لغة للحب"، وقال إن اللغة دي هتكون واحدة من خمس لغات مفيش غيرهم، لغة كلمات التشجيع، لغة تكريس الوقت، لغة الخدمات، لغة اللمسات، لغة الهدايا.
لو عرفت لغة الطرف اللي قدامك وعرفت تحبه بيها، أضمن لك أنه عمره ما هيدور على الحب براك، لأن أحياناً لما بتحب اللي قدامك بلغة غير لغته في الحب، هو جايز ميفهمش إن ده حب، لأنه شايف الحب بمنظور تاني.
وعلى قد ما يبان إن الموضوع معقد، على قد ما يبان أن الموضوع فعلاً يستاهل أنك تحاول، وأنك تجرب علشان توصل للي بتحبه، وعلشان تحافظ على علاقتك بيه، ومتحسسهوش إنه بيقدم أكتر ما بياخد اللي يستاهله أو يستحقه في العلاقة.
