فتاه ميت غمر تناشد النائب العام بالطعن على حكم براءة المتهمين بالتحرش بها
ناشدت بسنت محمود، المعروفة إعلاميًا بـ فتاة ميت غمر النائب العام بالطعن على الحكم ببراءة المتهمين في واقعة الاعتداء الجنسي عليها خلال ديسمبر المنصرم.
وكتبت فتاة ميت غمر منشورًا عبر حسابها على فيس بوك، قالت فيه: “أنا لسه منستش يوم الحادثة، لسه المشاهد المرعبة وهما بيلمسوني بتتكرر قدامي، لسه فاكراهم وهما بيتلموا عليا في الشارع وبيلفوا حواليا.. فاكرة بصاتهم ليا لما شافوني وباين الشر في عيونهم، فاكرة كل كلمة عن جسمي قالوها، فاكره كل إيد اتمدت ولمست جسمي غصب عني وأنا بصرخ في الشارع وبحاول أهرب منهم، لحد ما مخي اتشل ومبقتش عارفة أعمل ايه؟ على مسافة تقريباً 500 متر وأنا بحاول أهرب منهم بأي شكل، 500 متر وأنا بجري وكل اللي في دماغي إن يارب الأرض تتشق وتبلعني عشان اختفي من قدامهم”.
وأضافت فتاة ميت غمر : "منمتش يوم المحاكمة عشان كنت عارفة إن هشوف وشوشهم تاني، كنت عارفة إن هشوف كل اللي حصل في يوم الحادثة لما أشوفهم.. الصدمة اللي اتصدمتها في المحكمة والراجل اللي كان بيهربني صاحب العربية بيغير شهادته وبيقول مكنش في حاجة بتحصل.. طيب العربية والموتسكيل اللي كانوا بيجروا بيهم ورايا وأنا في العربية كانت ايه؟ وسامعين أصواتهم وهما بيهددوني إنهم مش هيسبوني غير لما يغتصبوني طيب كل ده كان ايه؟ واحنا بنهرب منهم على الطريق كان ايه؟ كنت بحلم يعني".
وتابعت بسنت فتاة ميت غمر : “قلبي اتعصر حزن لما شوفت الفيديوهات اللي نزلوها لما خرجوا من السجن، الناس دي لو كانوا طالوا يدبحوني في الشارع كانوا هيعملوا كده، إزاي أشوفهم وهما خارجين من السجن وكأن محصلش حاجة وكأن كل اللي حصل ده كان وهم في دماغي مش متصور صوت وصورة بالكاميرات”.
واستكملت بسنت حكايتها : “ أنا عرفت إن النيابة العامة حبست متحرش المترو وطعنت على قضية سيدة الكرم في المنيا وطعنت على قضية فتاة أجا، مواقف حقيقي عظيمة بس أنا مأخدتش حقي ومأخدتش حق كل بنت بتشوف اللي أنا شوفته وخايفين يبلغوا.. سيادة النائب العام أنا بترجى حضرتك تكون معايا ومتسبش حقي يضيع وحق البنات يضيع”.
