"لازم نوقف المهزلة".. عمرو سلامة يطالب النقابات بوضع قانون لمنع تأخير أجور صُناع الأعمال الفنية
نادى المخرج عمرو سلامة، بوضع قانون جديد يلزم شركات الإنتاج بإعطاء صُناع الأعمال بالسينما والدرما أموالهم حين الانتهاء من العمل بشكل مباشر.
وكتب المخرج عمرو سلامة في منشور عبر حسابه الرسمي بموقع التواصل الاجتماعي “فيس بوك”، قال فيه: “صناعة السينما والتليفزيون كلها إزاي ماوقفتش وقفة موحدة علشان يوقفوا مهزلة بقالها عقود؟.. مهزلة تأخير الفلوس أو الأجور أو الأرباح أو أحيانًا إنعدام تسليمها!”.
وتابع عمرو سلامة: “إزاي يكون في نظام حقيقي علشان العامل ياخذ فلوسه في وقتها، والفنان ياخذ فلوسه في وقتها، والمنتج ياخذ فلوسه برضه في وقتها، والقنوات تاخد فلوسها من المعلن في وقتها، والموزع ياخذ فلوسه من السينمات في وقتها، وهكذا!”.
وأضاف المخرج عمرو سلامة: “كل واحد في الشغلانة ديه أجره بيتعطل عند اللي قبليه، والدائرة مفرغة، كل ما تيجي تلوم طرف تلاقيه هو نفسه متعطله فلوس أو ليه فلوس ما قبضهاش”.
واستكمل المخرج عمرو سلامة في منشوره: “وطبعًا اللي على قمة الهرم ممكن يستحملوا لكن اللي تحت هم اللي بيجوعوا وساعات الواحد منهم ممكن مايعرفش يتعالج أو يدفع الإيجار أو يأكل عياله.. حاسس إن الناس الكبار اللي على قمة الهرم هم اللي قادرين أكثر نسبيا ياخدوا موقف، ويوقفوا تأثير الدومينا ده، والأصغر من حقهم يطالبوا بأجورهم حاضرة بدون وعود بتسويفها".
المخرج عمرو سلامة
وتابع: “طبعًا في ناس كثير في الشغلانة ممكن يكونوا بياخدوا أجور مبالغ فيها، وده الإنطباع اللي عند الناس والجمهور إن الفنانين والسينمائيين دول عايمين في بحور من الفلوس، لكن الحقيقة إن دول ال 1% - زي أي مجال المميزين فيه بياخدوا أجور كبيرة جدًا- لكن غالبية الناس أجورهم منطقية أو هزيلة، والأسوأ إن ساعات بيستنوا عليها شهور وساعات سنين وساعات مايخدوهاش خالص”.
وأختتم عمرو سلامة منشوره قائلًا: “مافيش شرير نعرف تشاور عليه في القصة ديه، هو بس نظام محتاج يتحط وكل الناس لازم تبحث يتحط إزاي وده المفروض الدور الأول لكل النقابات الفنية ثم ثانيًا وأخيرًا كل الناس اللي على قمة الهرم”.
