"حسيت أنه مش ابنها".. سيدة توثق تسول امرأة بطفل مخطوف (صور)
على غرار طفل أبو الريش، تداول مستخدمو مواقع التواصل الاجتماعي، منشور استغاثة لسيدة توثق تسول امرأة لطفل.
وتواصل "القاهرة 24"، مع صاحبة الاستغاثة لمياء النجار، وأوضحت أنها رأت المتسولة في ميدان العباسية تحمل طفلًا بشكل غير لائق، مما لفت انتباهها لمراقبتها.
وقالت:" كنت راجعة من العباسية لنادى السكة، وسايقة عربيتي، ولفت انتباهى الست دى وهى لبسة عباية كويسة، والهو بيطير فيها هى والبيبى اللي شيلاه عمره شهور قليلة، وكان الوقت ده تراب وعاصفة، ومش خايفة عليه وماسكة بطريقة غريب، وكانت بتشحت بيه ف الاشارة، ومبتسمة جدًا".
وأضافت:"استغربت الموقف، وراقبتها مدة الإشارة اللي كانت حوالي 3 دقائق، وكان قبلها بيومين قصة خطف الطفل بتاع ابو الريش، فاتعصبت وقررت أن أصور الطفل، من شباك العربية، وأنا واقفه في الإشارة، عند تقاطع امتداد رمسيس مع صلاح سالم".
وشددت أنها عند تصوريها للسيدة، هربت من أمامها، بعدما حذرتها متسولة أخرى، قائلة:" أول ما رفعت الموبيل وبدأت أصورها جات واحدة متسولة تانية بتقولها ألحقي دي بتصورك، أجري، وفعلا جريت بالطفل من قدامي".
واستكملت: "عند فتح الإشارة قربت منها وهي بتجري وصورت وشها، وجريت بسرعة على ضباط المرورو اللي واقفة، وقولتهم الحقوا بسرعة الست دي خاطفة الطفل ده، مشيرة أنهم تفاعلوا مع الموقف للحاق بها".
من جانبها أوضحت أنها خشيت الرجوع إلي المرأة التي حذرتها، خوفًا من أن يكون تشكيل عصابي.
كما أردفت: قررتُ نشر الصور والمنشور على الفيس بوك، خاصة على صفحات الأطفال المخطوفين، "عشان لو مخطوف يرجع لأهله".
