بولا وجيه يكتب: "علشانك"

قالت: "كان بيخطف قلبي وقت ما كان بيقول لي أنه عمل أي حاجة علشاني أنا وبس!"
أوقات كتير أوي بنحتاج نحس بالحب والتقدير من اللي قدامنا، آه مش بنحتاج لحاجات مبهرة، لكن بنحتاج لحاجة تحسسنا أننا فعلاً غاليين على قلب اللي قدامنا، حاجة تحسسنا أنه قادر يعمل أي حاجة علشان بس يقول لنا: "أيوة أنا موجود علشانك وبحبك!"
في أغنية محمد عبد المطلب، كان بيحاول يصور أنه مستعد يعمل مجهود يمكن يبان بسيط لكن مهم علشان يفوز بقلب حبيبه وهو أنه بيروح من السيدة للحسين مرتين في اليوم علشان بس طمعان يكون له معاه نصيب والحب يجمعهم سوا.
أول كل علاقة بيكون عند كل طرف من الطرفين حنان يمكن يساوي عشر أضعاف حنان الأم في أول أسبوع بعد الولادة، ويمكن كمان بيكون عند الأتنين الاستعداد التام أنهم علشان يثبتوا للطرف التاني حبهم، أنهم ينافسوا الأستاذ أحمد السقا في نطته الشهيرة لمنى زكي في فيلم أفريكانو.
وتلاقي قدرة رهيبة من الأتنين في أول العلاقة في حفظ التواريخ ولا أجدع مدرس دراسات اجتماعية، وبيربطوا الأغاني والأماكن بذكريات جمعتهم سوا وبحاجات كانوا موجودين فيها مع بعض.
لكن مع الوقت، عنصر الإبهار بيبتدي يقل، خلاص كل واحد فيهم ضمن وجود التاني، ضمن أن التاني بيحبه ومعاه، وكأن مش من حق قلب وعين الطرف التاني ينبهروا من تاني، أو بمعنى أدق، خلاص العين مبقتش شايفة ولا القلب حاسس غير بالطرف التاني وبس.
هي فعلاً عين الطرف التاني ممكن متشوفش، والقلب ممكن ميحسش بأي حاجة غير لو من الطرف التاني، لكن الحقيقة أن بيفضل جوانا شعور بأن نفسنا الطرف التاني ده يبهرنا، يعمل حاجة "علشانا"، يعمل حاجة تحسسنا أننا لسة "حلم" بيحاول يحققه، جوهرة بيحاول يوصل لها.
شريك حياتك اللي يمكن يكون ملى أو تخن أو بقى شكله مش ولا بد نتيجة ظروف الحياة وأنه بيحاول يجتهد علشان يوفر كل الحاجات الممكنة اللي تكون مريحة ليكم سوا بعدين، يستاهل أنه يحس أنه لسة جميل في عينك مهما حصل.
البنوتة الحلوة اللي كنت شايفها وردة في أول علاقتكم بتحلم بس تضمها لكن اتغيرت نتيجة مسئوليات ويمكن نتيجة بيت بقت شايلاه على كتافها في غيابك، تستاهل تحس أنها لسة الوردة اللي كنت بتحلم بيها، تستاهل تحس أنها لسة حلوة في عيونك ولسة هي فتاة أحلامك.
العلاقات مش بتحتاج للحب علشان تكمل، قد ما بتحتاج لأنك تحسس اللي قدامك بالأمان، أنه لسة حلو في عيونك، وأنك "علشانه" لسة مستعد تقدم حاجات أكتر بكتير علشان علاقتك بيه تستمر وتفضل للأبد.
الحب يمكن بيروح مع الأيام، لكن القلب عمره ما بينسى الطبطبة والحنية اللي بتجيله وقت ضعفه، وتحسسه أنه لسه جميل ويستاهل حاجات كتير أوي.