"هنا الزاهد عيّلة صغيرة وبتتقمص بسرعة".. أبرز تصريحات أحمد فهمي في برنامج "يوم ليك"
فن
أحمد فهمي
حلّ الفنان أحمد فهمي، ضيفًا في برنامج "يوم ليك" المُذاع على قناة الحياة مع الإعلامية سمر يسري، وتحدث حول خلافاته والتي أدت إلى انفصاله عن الثلاثي هشام ماجد وشيكو، بجانب علاقته بزوجته هنا الزاهد، وبعض المواقف الطريفة التي مروا بها سويا.
وفي ذلك التقرير نستعرض أبرز تصريحات أحمد فهمي مع سمر يسري في برنامج “يوم ليك”:
- كنت في الأول برّد على أي كومنت وحش يجيلي، وده من سنتين مثلًا، لأن أنا مكنش عندي قبلها انستجرام، وجودي على السوشيال ميديا كان من ساعة ما خطبت هنا الزاهد.
- أنا ممكن أطلع طول الوقت أمثل على الناس ودا سهل جدًا، لكن أنا مبحبش النفاق والكدب.
- السبب في مشاكلي مع هشام ماجد وشيكو كانت على الشغل، وإحنا منفصلين عن بعض، ولكن عمر ما كان في بيننا نفسيات من ساعة ما سيبنا بعض، كل الخلافات اللي بيننا فنية بحتة مفيش أي حاجة تاني لو في حاجة تاني هقولها.
- أنا كنت بلوم على شيكو دائما في مشاكلي أنا وهشام، وبطلب منه يكون حاسم حتى لو ضدي يقولي أنا غلط لكن هو بيخاف يزعلنا.
- إحنا شخصياتنا مختلفة، أنا عصبي جدًا، لكن هشام بروده ممكن يوصلك لمرحلة تنرفز.
- الزعيم أنجح ممثل في العالم في بلده، عمل تاريخ كبير لمصر مش لنفسه بس.
- الناس بتشتم عمرو يوسف على مسلسل لسه متعرضتش، مع أن برومو مسلسل "الملك" لعمرو يوسف هو أحلى برومو شوفته، لحد دلوقتي في الدراما مش قصدي غلطات تاريخية.
- عمري كما كنت أتخيل إني أعمل فرح، لإني مش بحب الزحمة ودوشة الأفراح.
- هنا الزاهد تبان كيوت، لكن هي شخصية قوية جدًا، هي بتسمع الكلام لكن مسيطرة في البيت.
- بنتخانق أنا وهنا على اهتمامي بالكلاب، هي بتحبهم بس أنا أوفر، فهي بتضايق ساعات إني بدلع الكلبة أكتر منها، ومرة عيطت، وقالتلى مرة الكلبة زيزي هتبقي سبب طلاقنا.
- اتخانقت مع حماتي عشان كانت بتدافع عن هنا في حاجة، عشان مش بحب حد يتدخل وبعد كده بقينا صحاب جدًا.
- هنا الزاهد عيّلة صغيرة وبتتقمص بسرعة، وعيطت عشان قولتلها هقعد في أوتيل وهي عندها كورونا، لكن في الآخر قعدت فوق في البيت وسيبتها تحت.
