محمد عطوة: الجهاز الطبي لبيراميدز تسبب في إصابتي ومسئولي النادي تجاهلوني
كشف محمد عطوة مدافع نادي الاتحاد السكندري أنه تعرض للإصابة في بداية مشواره مع ناديه السابق بيراميدز بسبب الجهاز الطبي.
وقال عطوة في تصريحات تليفزيونية: "أول ماتش في الدوري قصاد انبي كنت احتياطي وبعدها جالي اصابة، الجهاز الطبي اللي مش عايز اقول أنه مش كويس كان هو سبب إصابتي".
وأضاف "اشتكيت من آلام و الجهاز الطبي قالي عادي انزل اتمرن ولما نزلت اتصابت، اتعالجت وبعدين نزلوني بدري ف اتصابت تاني".
وتابع "واجهت تجاهل غريب، في شهر يناير بدأت اتأهل برة النادي واستاذنت النادي اني اخرج اتأهل برة، بعد ما خلصت التأهيل برة، جه حد في منصب مستشار فني للنادي وبعدها مسك مدير فني بشكل مؤقت، لقيته طلب مني فيديوهات علشان يشوف مستوايا ودي حاجة غريبة جدًا، بعدها المسؤول الي جابني بيراميدز كلمني وأنا مصاب بعد فترة طويلة من التجاهل ومحدش كان بيكلمني ولا بينزل خبر ان في إصابة، وكلمني يتطمن علشان يعرف آخر تطوراتي بسبب وجود عرض لعبد الله بكري من السعودية، الجهاز الفني كان بيقول استبعادي لأسباب فنية وانا مصاب اصلًا".
وواصل عطوة "تجاهلوني أثناء إصابتي، في الوقت الي في لاعب ثاني جاله إصابة في الخلفية النادي قرر يسفره الإمارات يتعالج وانا اتعرضت للإصابة مرتين محدش سأل فيا".
واختتم مدافع الرائد السعودي السابق تصريحاته "المركز الإعلامي مكنش بينزلي صور مع الفرقة، واتكلمت مع المسؤولين وبعدها بداوا ينزلوا ليا صور مع اللعيبة عادي، مش عارف ايه السبب لكل ده".
