غادة عبد الرازق: "نفسي أقدم دور مُغسلة الموتى" (فيديو)
كشفت الفنانة غادة عبد الرازق، طبيعة الدور الذي تتمنى أن تقدمه خلال مسيرتها الفنية، وذلك خلال لقائها ببرنامج “ليلة الخميس”، الذي يعرض على قناة “MBC مصر”.
وقالت غادة عبد الرازق إنها تود تقديم شخصية “مُغسلة الموتى”، مضيفة: “مهنة صعبة جدا، وشوفتها قدامي لما أمي ماتت في البيت، وحسيت قد ايه هي شغلانة غريبة وصعبة، وبيكونوا متماسكين أوي، وبيرجعوا بيتهم ويكملوا حياتهم وكأنهم معملوش حاجة”.
وعن موهبتها قالت خلال اللقاء: “الحتة القوية اللي عندي، هي إني موهوبة جدا بالفطرة، وبتعامل مع التمثيل بقلبي مش بعقلي، وده اللي بيميزني، وأول ما الممثل بيشتغل بقلبه وعقله في العمل اللي هو بيشتغله، ويبدأ يتفزلك، لازم يبوظ”.
غادة عبد الرازق
وتابعت: "مش هنكر إني بحس أني في منطقة لوحدي في الوسط الفني، واللي حواليا بيقولوا لي إنت مش حاسة بقيمة نفسك، أنا حاسة فعلًا بحجم موهبتي، ولكن مش بتعالى بها على الناس أو زمايلي أو أكل عيشي، وساعات بصدق الناس، لما بيقولوا لي إنت في منطقة لوحدك، ومفيش أي حاجة ممكن تهزني أو توقعني، ولكن ده مش معناه أني مكنش قلقانة من المنافسين ليا، وحريصة دومًا على متابعة أعمالهم".
مسلسل لحم غزال
وتشارك غادة عبد الرازق في الموسم الرمضاني المقبل 2021، بمسلسل “لحم غزال”، ويجمعها بكلا من شريف سلامة، عمرو عبد الجليل، مي سليم، أحمد خليل، خالد كمال، ووفاء عامر، من تأليف إياد إبراهيم، وإخراج محمد أسامة.
وبرنامج "ليلة الخميس" يجمع نخبة من النجوم في حوارات ومُناقشات جريئة وغير تقليدية، تكشف الكثير من القصص والكواليس في أجواء من الترفيه الراقي في سهرات أسبوعية شيقة.
