مريم نعوم عن إيقاف تصوير مسلسل "الملك": "مش ضغط الجمهور اللي هيخلي الشركة المنتجة تعمل كده"
علقت الكاتبة مريم نعوم على أزمة وقف تصوير مسلسل “الملك.. كفاح طيبة”، للفنان عمرو يوسف، الذي كان من المقرر عرضه في الموسم الرمضاني المقبل 2021، لكن الشركة المنتجة قررت إيقاف تصويره بعد العديد من الانتقادات التي وجهت للعمل.
وكتبت مريم نعوم عبر حسابها الشخصي بموقع التواصل الاجتماعي “فيس بوك”، وقالت: “لو احنا معتبرين نفسنا فنانين.. إذا مبدعين - لإن الفنان لو مش مبدع يبقى حِرَفي شاطر لكن مش فنان.. وده برضو موجود ومش عيب خالص - يبقى بالتأكيد غيورين على فننا”.
وتابعت: “صحيح العالم أطلق على شغلنا إنه (صناعة الترفيه - entertainment industry)، بس الترفيه مش معناه تقليل قيمة الفن وتحويله لسلعة، المسرح ومن بعده كل الفنون السمعية البصرية هي فنون، فنون ليها قيمة كبيرة قوي قوي قوي، وتأثير بيعيش سنين وسنين، ما ينفعش إحنا بنفسنا نسفه من قيمتها وقيمة مجهود عظماء، أفنوا عمرهم في الصناعة دي، إحنا أول ناس لازم ندافع عن زملائنا، إنهم ياخدوا وقتهم عشان يتقنوا فنهم، ده حقهم علينا وحقنا على الصناعة، ساعتها دي معركة عادلة”.
وأضافت: “وقف - مش منع - مسلسل عشان تصحيح مسار الأمور، المفروض يدينا أمل إن أخيرا في شخص أو جهة - حتى لو في أهداف أحنا مش عارفينها - أدرك إن الضغط اللي بيأدي لقبول الأخطاء بحجة (هتعدي) ضغط، مش بس بيقتل الصناع حرفيًا، لأننا فقدنا أرواح بسبب الضغط ده، لكن كمان بيحول الفن لسلعة ممسوخة”.
وأردف: “لو محتاجين نقف في ضهر بعض، يبقى نقف ونقول إننا محتاجين نكتب وبعدين نصور، نحضر وبعدين نصور، محتاجين الصناعة ترجع لقواعدها سالمة.. المنتج والمخرج والمؤلف هما اللي بيحددوا مين الأنسب للعمل مش العكس، من وجهة نظري المتواضعة، دي معركة الفنانين المبدعين الحقيقية”.
واستكملت: “لكن خلط الأمور بإن المسلسل تم منعه، وربط ده بحرية التعبير، ده أمر في غير محله، لإن المسلسل ده تحديدا محدش ذكر المضمون الدرامي، حتى هذه اللحظة على الأقل، محدش اتكلم عن القصة أو السيناريو أو الحوار عشان يبقى قمع لحرية التعبير، وإلقاء اللوم على الجمهور والسوشيال ميديا برضه في غير محله، لإن كلنا كصناع في السوق، عارفين إن الشركة المنتجة مش ضغط الجمهور أبدًا اللي هخليها توقف المسلسل عشان تراجعه”.
أبطال مسلسل الملك
ومسلسل “الملك” بطولة كلا من عمرو يوسف وماجد المصري وسوسن بدر وصبا مبارك ومحمد لطفي ومحمد علاء وأمير صلاح وريم مصطفى، وعن قصة نجيب محفوظ وتأليف شيرين دياب وخالد دياب، وإخراج حسين المنباوي وإنتاج سينرجي.
