الطفل المعتدى عليه بالضرب على يد ضابط بالمنصورة: "ضربني بقوة بدون ذنب" (فيديو)
استكمالًا لمسلسل العنف غير المبرر ضد الأطفال، ظهر مقطع فيديو متداول يبدو فيه رجلًا أثناء اعتداءه على طفل لم يتخطى الثمانية من العمر، داخل سوبر ماركت بمدينة المنصورة.
وقال الطفل سامح الذي تم الاعتداء عليه من قبل رجل داخل ماركت بالمنصورة لـ"القاهرة 24": "بابا شغال سايس عربيات وكان بيكشف على إخواتي عند الدكتور، وقالي خلي بالك لحد ما أرجع وواحد جه تبع جراج عمارة عايز يدخل لقيت عربية قافلة الطريق، دخلت لصاحب العربية بقوله بعد إذنك حرك العربية عشان نوسع الطريق راح ضاربني بالقلم على وشي".
وتابع: "اتصلت بـ بابا وبلغته باللي حصل وخليت صاحبه يكلمه عشان يتابع معايا.. بس لما ضربني الراجل الكبير أنا عيطت ومشيت من قدامه".
وفي السياق، كشف محمد الصاوي والد الطفل سامح، في تصريحات لـ"القاهرة 24"، تفاصيل الواقعة، قائلاً: “أنا كنت خارج المنزل أثناء حدوث الواقعة، فتلقيت اتصال من سامح بيكلمني من تليفون واحد صاحبي هو بيعيط ومنهار، وقال لي فيه راجل ضربني، فكلمت صاحبي وبلغته يروح معاه يشوف مين اللي ضربه، ماكنتش متوقع إنه رجل كبير هو اللي ضربه"، زاعمًا والد الطفل أن المتعدي على ابنه ضابط.
وأكمل حديثه: "لما رجعت البيت لقيت ابني نايم تعبان سألته إيه اللي حصل قالي في واحد ضربني في أوكازيون، وجبت الفيديو من الكاميرات لقيت فيديو ضرب سامح وحاجة مهينة جدًّا.. أنا بستغرب إيه اللي يخلي راجل زي ده يضرب طفل 9 سنين بالقسوة دي".
وأضاف: "أنا مجاش في دماغي أن ضربه بكل القسوة دي، ابني غلط في ايه قاله ممكن تشيل العربية عشان ناس تعرف تدخل الجراج، أنا كنت ناوي أسامح وأنسى لولا أن شوفت الفيديو وشوفت ضربته لابني بكل القسوة".
وتابع: "بعد الواقعة توجهت إلى قسم ثان المنصورة وحررت محضر، وأخدوا أقوال سامح ابني ولكن المحضر بدون اسم، ولابد من وجود اسم الشخص اللي ضرب ابني حتى لا يحفظ المحضر.. بس أنا مش هسيب حق ابني وحق أي طفل بينضرب بكل هذه القسوة".
وفي السياق ذاته، قالت مروة ماهر التي نشرت الفيديو على صفحات التواصل، في تصريحات لـ"القاهرة 24": “الطفل بعد الواقعة كان منهار بسبب ما حدث له، وتحدث لنا بقهر أنا عملت إيه عشان يضربني كده"، مضيفة: "لما لقيت الطفل منهار من العياط سألته ايه اللي حصل قالي راجل ضربني ولما خرجنا نسأله ضربته ليه زعق ومشي نزلت المقطع على مواقع التواصل".
