"أنا رحت لصاحبك البيت".. ننشر اعترافات زوج إسراء عماد في واقعة التعدي (مستندات)
حصل “القاهرة 24” على نص التحقيقات في القضية المعروفة إعلاميًّا بـ“إسراء عماد” بعدما تعرضت الأخيرة للاعتداء من قبل زوجها، وإحداث إصابات جسيمة بوجهها وجسدها، وتم القبض عليه وإحالته للنيابة العامة.
وجاء نص التحقيقات كالتالي:
س: ما قولك فيما هو منسوب إليك من أنك متهم بالشروع في قتل المجني عليها إسراء عماد حبشي، وأنك قمت بالتعدي عليها بالضرب باستخدام سلاح أبيض موضع الاتهام التالي، وأحدثت ما بها من الإصابات الموصوفة بالتقرير الطبي، قاصدًا من ذلك قتلها وقد خاب أثر جريمتك بسبب لا دخل لإرادتك فيه وهو تداركها بالعلاج؟
ج: محصلش أنا ضربتها فعلًا بس ماكنتش عايز أموتها.
س: ما قولك فيما هو منسوب إليك من أنك متهم بإحراز سلاح أبيض بدون مسوغ قانوني أو حرفي أو مهني لحمله؟
ج: أنا كنت واخد معايا سكينة عشان كنت خايف تنتقم مني.
س: وما كيفية تعديك على المجني عليها إسراء عماد حبشي؟
ج: اللي حصل إن في بينا خلافات من حوالي شهرين، وكانت سايبة البيت وواخدة ابني، وماكنتش بتتكلم معايا خالص، وكانت عايزة تتطلق وأنا مكنتش عايز أطلقها، وفي الفترة دي كانت متخانقة مع أختها “دنيا عماد حبشي”، وبعد كده عرفت من أختها دنيا إن هي بتكلم واحد صاحبي اسمه "حسن .ط .ح"، وهي كان في مشاكل بينها وبين والدتي وبينها وبين خطيبة أخويا، وأنا حبيت أصالحها وكانت دايما بتقولي عايزة تتطلق وكانت دايما تقولي عايزة حقها من أمي وأخويا، أقولها مالكيش دعوة بينا، واتفقنا إن إحنا نرجع لبعض، وقلت أحايلها وأقولها إن أنا موافق عشان تحل الموضوع.
بعد كده رحت قعدت معاها في بيت والدتها وشدينا تاني، بسبب إن هي عايزة أعمل كده مع والدتي وأخويا، وأنا رفضت وسيبت البيت ومشيت، وفي نفس اليوم لقيت جار لیا اسمه عم جمال، وده ساكن فوقي اتصل بيا وقالي إن هو عاوزني، وهو يعتبر اللي مربيني وبعد كده طلعتله لقيت إسراء فوق وحاطة مكياج وسايبة شعرها، وهو حب يصالحنا مع بعض بس هي كلمتني بأسلوب مش حلو، وقالتلي مش هتشوف ابنك تاني، وهو قالها يابنتي اتكلمي بأسلوب حلو، قالها انزلي تحت وأنا نزلت معاها وقولتلها هغير هدومي وأنزل، وأخدت سكينة معايا ساعتها عشان كنت خايف تكون جايبة حد ينتقم مني، ونزلت بعد كده قعدنا ونزلت اتكلمت معاها ولقيت أمي وأخويا نزلوا، وأخدت مني مفتاح التاكسي وطلعت هي وأخويا مصطفى، وهي اضايقت عشان أخدت المفتاح وشافت السكينة في جيبي، راحت أخدتها وأنا مسكت منها السكينة فاتعورت في إيدي، وهي قالتلي إن أنا رحت عند حسن طارق حسن صاحبك البيت، وأنا اضايقت عشان هي قالتلي إنت شايف إيه بعد اللي انا قولتهولك، وقعدت أضرب فيها بالسكينة، وأول ما وقعت أخدتها في التاكسي، ورحت على المستشفى وأخويا مصطفى كان معايا ونزل في السکة عشان خاف وأنا رحت المستشفى وقالولي دي حادثة، قولتلهم لا أنا اللى عملت كده وبعد كده خدوني من المستشفى على القسم.
س: وما سبب تعديك على المجني عليها إسراء عماد حبشي؟
ج: علشان هي قالتلي إن هي راحت عند صاحبي البيت، وقالتلي هطلقني ولا إيه بعد اللى أنا حكيتهولك، وأنا اضايقت وضربتها عشان قالتلى الكلام ده وعشان قالتلي كمان أنا بحبه وهتجوزه.
س: ما سبب إحضارك سلاحًا أبيض سكين قبل تقابلك مع المجني عليها؟
ج: علشان أنا مش متعود أشوف إسراء من غير ابننا، وكمان هي جيالي في وقت متأخر الفجر، فأنا خفت لتكون عاوزة تعمل فيَّ حاجة عشان في بينا خلافات.
س: وما هي طبيعة تلك الخلافات؟
ج:هي كانت متخانقة معايا عشان كان في خلافات بينها وبين والدتي وأخويا، وكانت طالبة الطلاق وسايبة البيت بقالها شهرين، والخلافات اللي بينها وبين أمي معرفش سببها ايه بس هما مش بيحبوا بعض، واللي بينها وبين اخويا علشان هي بتغير من خطيبته، وأنا شتمتها وضربتها قدامهم قبل كده علشان كان في مرة شتمتهم وشتمتني، وده كان سبب الخلاف بتاع الخناقة من شهرين.
س: وهل ترقى تلك الخلافات بقيام سالفة الذكر بمحاولة الانتقام منك؟
ج: علشان أنا كنت عندها من يومين واتخانقنا تاني، علشان هى قالتلي أنا حلمت إن أنت بتكلم واحدة، قالتلى أنا عايزة حقي من والدتك وأخوك، إن أنت تقول لوالدتك ملكيش دعوة بينا، وأشتم أخويا.
س:وما هي علاقتك بالمدعو حسن؟
ج: هو صاحبي.
س: وما هي علاقة المجني عليها إسراء عماد حبشی بالمدعو حسن؟
ج: هو لما كنا متخانقين من شهرين فاتوا واختها دنيا قالت لوالدتي إن هي سمعتها بتتكلم مع حسن، وحكيتلها إن هي راحت له البيت، وهي دنيا حكيت لأمي، وأنا لما اتصالحنا ورحت لها عند بيت أمها من حوالي أسبوع سألتها وقالتلي إن هي كلمته بس عشان نرجع لبعض بس هي مرحتلهوش.
س: متى وأين تحديدًا قمت بالتعدي على المجني عليها إسراء عماد حبشی؟
ج: يوم 26 مارس 2021 حوالي الساعة 3.30 صباحًا بشارع 15 سيدي بشر قبلی.
س: وما هي ظروف تقابلك مع المجني عليها تحديدا؟
ج: أنا كنت قاعد عند بيت أمها ولما اتخانقنا سيبتها وماردتش أرد عليها في التليفون، ورجعت عند بيت والدتي، ولقيت جار واسمه عم جمال بيتصل بيا، وبيقولي تعالى فطلع له عشان هو اللي مربيني بس معرفش هو كان عايزني في إيه، وطلعت لقيت إسراء فوق وأنا كنت همشي بس هو حب يصالحنا، مع بعض وهي كلمتني بأسلوب وحش وهو قالنا انزلوا وقالتلي هستناك تحت، وقولتلها هغير هدومي وأنزلك.
س: ما التصرف الذي بدر منك آنذاك؟
ج: أنا غيرت هدومي ونزلت فعلا علشان أشوفها، وأخدت معايا سكينة عشان كنت خايف تعمل فيا حاجة ونزلت اتكلمت معاها.
س: وما هي علاقتك بالمدعو جمال؟
ج: هو جاري وهو اللي مربيني وطلعت لقيتها عنده ومعرفش هي وصلتله إزاي.
