مواطن مصري يروي موقفًا صعبًا تعرض له من أمن مطار أديس أبابا بسبب جنسيته
روى أحد المواطنين المصريين، عبر صفحة Traveller Experience المهتمة بتوفير معلومات عن السفر، على "فيس بوك"، موقفًا تعرض له خلال سفره لإفريقيا مستقلا الطيران الوطني الإثيوبي، لافتًا إلى أن هذا الموقف حدث بسبب أنه مصري الجنسية.
قال المواطن علي أحمد، إنه كان مسافرًا لإفريقيا، ولم يجد حجزًا بسعر مناسب سوى على متن الطيران الإثيوبي، إلا أن فترة الانتظار "الترانزيت" في التذكرة كانت 14 ساعة في أديس أبابا.
وأوضح أنه تواصل مع مكتب شركة الطيران الإثيوبي، وبدورهم أوضحوا له أن سياسة الشركة في حالة الترانزيت الطويل أن تتكفل بتأمين ليلة في فندق بجوار المطار حتى موعد إقلاع الطائرة.
وتابع: "بالفعل قبل ما أطلع الطيارة ادوني ورقة فيها حجز الفندق باسمي أنا وعدد كبير جدا من اللي كانوا ع الطيارة من جنسيات مختلفة".
وأضاف: "أول ما وصلنا مطار أديس أبابا.. كانوا بيشوفوا معانا ورقة حجز الفندق وكانوا بيشاوروا أننا نروح ناحية مكان فيه ظباط جوازات بيشوفوا الورق وبعدها بنطلع على الأتوبيس".
وأكمل: "كل الناس بتعدي تمام وأول ما وصلت على الشباك وبص في الجواز وبيقلبه وشاف عليه النسر من برا .. قال تعالى معايا.. خدني لمكتب داخلي وقال اقعد استنى هنا.. وانتظرت حوالي تلت ساعة وبعدها جه ظابط تاني قال تعالى ورايا.. مشيت وراه .. شاورلي على ظابط واقف بعيد قال روحله وهو هيوجهك تروح فين".
وتابع: "رحت للظابط أول ما شافني لمح في إيدي حجز الفندق قالي ادخل الطابور عشان تروح الفندق .. قلتله هما طلبوا مني أجيلك عشان توجهني أروح فين.. مسك الباسبور وقالي إنت مصري؟ قلت ايوة .. قال امشي لآخر الدور دا هتلاقي مكتب ع الشمال روح هناك هيديك ورق".
وأضاف: "مشيت رحت هناك المكتب قالي استنى برا لما أناديلك .. بعد حوالي ساعة إلا ربع دخلني .. وقالي إي مشكلتك؟ .. قلتله أنا معنديش مشكلة .. هما طلبوا مني أجي هنا .. قالي أنت مصري؟ قلت أيوة.. قالي أنت مينفعش تطلع برا المطار.. ممنوع.. حتى لو معاك حجز فندق.. قلت طب اي العمل حالياً .. قال هعملك ورقة هتطلع فوق فيه صالة انتظار (platinum) هتفضل فيها لحد ميعاد طيارتك.
وأوضح علي أحمد أنه لم يتعرض لعنصرية أو شيء من هذا القبيل في التعامل معه، ولكن تعرض لانتهاك حق من حقوقه، والذي تعهدت به شركة الطيران الإثيوبية بتوفير حجز فندقي له فترة الترانزيت.
