طه عبد الوهاب كوافير أحمد السقا بعد سخرية السوشيال ميديا": "تعليمات المخرج أمشي الموس على راس السقا يوميًا"

خلق تواجد اسم طه عبد الوهاب، الكوافير الخاص بالفنان أحمد السقا، على تتر مسلسل "نسل الأغراب"، والذي يعرض في الموسم الرمضاني الحالي 2021، حالة من الجدل والسخرية.

وتسائل الكثيرون عن وظيفة طه عبد الوهاب في ذلك العمل، وما الدور الذي يلعبه خاصة أن شخصية أحمد السقا في العمل، رجل أصلع، فما الذي يقوم به الكوافير.

وتواصل "القاهرة 24" مع طه عبد الوهاب، لمعرفة تفاصيل تعاونه مع السقا، وقال: "كل يوم لازم نمشي الموس على شعره، لإن تلك هي تعليمات المخرج بما يتوافق مع الشخصية التي يقدمها السقا، لإن شعره كل يوم بينبت، لو كان هيظهر بشعره الطبيعي، مكنتش هتعب كدة".

وتابع: "ده نجم ولو حصل أي مشكلة أو جرح أو التهابات، هتبقى مسئوليتي ووقتها التصوير هيتعطل والعمل كله هيقف، فأنا عليا مسئولية كبيرة، وأنا بقف على رجلي لمدة 18 أو 20 ساعة تصوير".

ورد على الساخرين منه وقال: "دي ناس فاضية، ولو اللي بيتريق يعرف اللي أنا بعمله، ييجي يشتغل مكاني، ده إذا السقا وافق أصلا، لإنه بيثق فيا، وشغال معاه بقالي 20 سنة، واشتغلت معاه قبل كدة في أعمال كتير زي فيلم العشق والهوى، والديلر، وحرب إيطاليا، وتيمور وشفيقة".

وأضاف: "أنا في المجال بقالي 40 سنة، وسبق واشتغلت مع نجوم كبار زي أحمد زكي ونور الشريف والفنانة يسرا، وتاريخي كبير".

واستكمل: "كل اللي انتقدوني أو سخروا مني، محدش فيهم فكر إن ليا عائلة وأولاد، وطبيعي شيء زي ده يضايقني ويضايق عيلتي، ده غير إننا في أيام مفترجة، يعني حرام يتريق على حد".

حرق منزل عساف الغريب.. كومبارس يكشف أحداث الحلقات الأخيرة من مسلسل "نسل الأغراب"