"الاغتصاب جريمة ملهاش مبرر وأنا ضد شخصية حمّاد".. مهند حسني يعلق على دوره في "الطاووس"
أوضح الفنان مهند حسني رفضه التام لقضية الاغتصاب وعدم تعاطفه مع المتحرش، وهذا عكس شخصيته في مسلسل "الطاووس" بطولة الفنانة سهر الصايغ وجمال سليمان.
وكتب مهند منشور، عبر حسابه الرسمي بموقع التواصل الاجتماعي "فيس بوك"، قائلًا: "الأغتصاب جريمه مالهاش مبرر.. وأنا شخصيًا ضد شخصية حمّاد اللي بظهر بيها في رمضان السنة دي في مسلسل الطاووس".
وتابع: "وبالمناسبة أنا عمري لا اتعاطف ولا هتعاطف معاه، وعلى اقتناع تام إن شكل وهيئة المتحرش والمغتصب ومستواه المادي والاجتماعي مش ممكن أبدًا يكونوا حاجة نتعاطف بيها معاهم".
وأضاف: "توضيح أنا بعمل شير لكل آراء الناس المتابعة والمتفاعلة مع المسلسل "كل الآراء"سواء سلبية فيها دعاوي وحسبنه عليا وشتايم ليا ، وبردو الإيجابية اللي فيها كلام حلو بكل أشكاله. واللي يعرفني كويس او متابعني من زمان هيلاقينى دايما بعمل كده".
مهند حسني يوضح رأيه في شخصية حمّاد
واستكمل: "وده مش معناه إن مؤيد لكل الكلام اللي بعمله شير، وده بردو مش معناه إني بشجع الناس تستهين بالموضوع لمجرد إن شخصية حماد المغتصب ده شكله وسيم.انا بعمل شير لمشاركة نجاح الدور مع الناس كعادتي ليس إلا".
وتابع: "واللي وصل للبعض غير مقصود تماماً، واللي كنت بحاول اعمله إني أحاول اتفاعل مع جمهور المسلسل اللي يشجعوني أو بيقولوا كلام كويس أو كلام مش كويس بإني اهتم بكلامهم مش أكتر".
واختتم حديثه قائلًا: "واخيرًا الشخصيات اللي زي حمّاد ده ماينفعش اننا نتعاطف معها لأي سبب مهما كان".
يشار أن مسلسل “الطاووس” بطولة كل من جمال سليمان، وسيدة المسرح العربي سميحة أيوب، وسهر الصايغ، وأحمد فؤاد سليم، هبة عبد الغني، ومها نصار، سيناريو وحوار كريم الدليل وإشراف على الكتابة المؤلف محمد ناير، وإخراج رؤوف عبد العزيز.
