"سيدة الرزق الحلال" باكية: "متستعجلوش على رزقكم"
استضافت "القاهرة 24"، الحاجة رضا، والتي تصدرت مواقع التواصل الاجتماعي بعد فيديو مذيع الشارع أحمد رأفت بعد إجابتها على سؤال المسابقة، وقدم لها المذيع مبلغا ماليا، إلا أنها صُدمت قائلة: "هي كده الفلوس دي حلال..عشان أنا ماشقتش فيها".
وقالت أم سيد، الشهيرة بسيدة الرزق الحلال: "أنا كنت شغالة في نادى فى مدينة 6 أكتوبر، والحمد لله ربنا كرمني، ولما مشيت من الشغل إحدى صديقاتى تدعي أم أبراهيم قالتلي هنوديكي الجزيرة تابعنا".
وأضافت أم سيد باكية لـ"القاهرة 24":"أنا مشيت علشان خلاف مع صديقتي قبل مقابلة مذيع الشارع بعدة أيام، وزعلت أوي لأنى المكان ده كان فيه رزق حلو لكن البطون تتعارك"، متابعة “متسعجلوش على رزقكم يارب اللي زعلان مني يسامحني، ويومها ربنا بعتلى 3 آلاف جنيه”.
وأضافت الحاجة رضا، خلال لايف "القاهرة 24"، “موقفتش على باب حد فى يوم من الأيام وقلت أديني، رغم المسئولية التى كانت على ظهري فى تربية ولادي الأيتام، والحمد لله كنت براعى ربنا فيهم، وأكسب رزقى من حلال لأن زوجى تركهم أمانة لي".
وتابعت: “الحلال مفيش أحسن منه، وأنا كنت بمشى بما يرضى الله، وربنا كان بيرزقنى من فضله، معايا 3 أولاد وبنتين، ظروفهم ضيقة لكن كله بقدر الله والحمد لله راضين”.
وأوضحت "كنت راجعة من الشغل، وكان معايا 7 جنيه، وكنت محتاجه فوقهم 2 جنيه للوصول إلى منزلي في منطقة ناهيا بالجيزة، وربنا كرمني بلا ترتيب”.
وتابعت “أنا بشتغل ليا 30 سنة، عشان زوجي توفى وهو مريض وترك ليا 5 من الأيتام، كنت بسعى على رزقهم الحلال، وعندما تقابلت مع مذيع الشارع، وأعطاني الفلوس أصبت بحالة من الذهول، ورديت عليه أنت بتكلم جد.. طب هي حلال؟"، وهو رد عليا: "أيوه حلال مش هتكون حلال ليه؟، أنا كنت مترددة عشان أنا ما شقتش بيهم".
وتابعت:" أنا مش بقول كده عشان بنصور بس أنا خلاص حاسة إن عمرنا خلص، يارب لو زعلت يسامحني".
