وجدت مسجد العمل بدون زينة فصنعتها في 5 أيام".. شاب مسيحي يسعد زملاءه المسلمين بفانوس رمضان (صور)
"من صغري واحنا متربين مسلمين ومسيحين مع بعض وبنستنى رمضان وبنفطر سوا".. هكذا بدأ مينا عادل حافظ، شاب مسيحي، يعمل في شركة مصر للألومنيوم بنجع حمادي، حديثه مع "القاهرة 24"، حيث فاجأ زملاءه في العمل بفانوس صنعه بأنامل يديه، من أجل إسعادهم.
يقول مينا:" من صغري بنفطر مع بعض مسلمين ومسيحين، ودي حياة الطفولة، وكانت أحلى أيام، وبعد ما كبرنا واشتغلت فى المصنع، مشيت على نفس التربية اللى اتربيتها مع زميلى فى الشغل، وبقى بينا المحبة والود".
فكر "مينا" في صناعة فانوس للمسجد لكي يسعد زملاءه:" بالنسبة لموضوع الفانوس هى فكرة خطرت فى بالى لما لقيت المسجد الموجود بمكان العمل فى المصنع بدون أي زينة ولا فانوس، وده أنا متعودتش عليه، طلعت فى دماغى إنى أفرح زميلى وأشاركه فرحة شهر رمضان، وأصنع فانوس مع حبال الليد وأعلقهم فوق المسجد".
استمر في صناعة الفانوس لمدة 5 أيام، فكان ينجز مهام عمله وينهي دوامه، ثم يجلس يصنع الفانوس، حتى نجح في تكملة الفانوس من الصاج الألومنيوم.
وعن ردود الفعل حول الفانوس، يقول:" ردود الفعل كانت أكتر مما كنت متوقع، زمايلى كلهم شكرونى وكانو بيدعولى على العمل اللى أنا عملته".
ووجه رسالته لكل الناس، قائلا:" بوجه رسالتي لكل إخوتنا، مسلمين ومسيحيين وكل المصريين، إحنا أخوات، وأحب أعيد عليهم، كل سنة والمصريين بألف خير وصحة وسعادة وربنا ما يفرق بينا طول العمر".
