صاحب عربية قهوة متنقلة يناشد المسئولين: "محتاج ترخيص عشان ورايا 5 بنات ومالناش دخل غيرها"
موسى محمد المهدي علي، شاب يبلغ من العمر ثلاثين عاما، يقطن في منطقة بولاق الدكرور، يمتلك عربية قهوة متنقلة يقف بها في ميدان الثورة بالدقي، يناشد الشاب المسئولين من أجل الحصول على رخصة للسيارة.
يحكي قصته لـ"القاهرة 24": "أنا كبير إخوتي، معايا 5 بنات وأمي، ووالدي متوفي، اشتغلت تقريبا كل حاجة، زيي زي معظم الشباب، عشان أقدر أتزوج".
وأضاف: "حصلت على دبلوم سياحة وفنادق، اشتغلت فترة في السوبر ماركت، ولفيت على الكافيهات والمطاعم، واشتغلت دليفري، وسافرت بره مصر، بس مكملتش بسبب أن الكفيل غير كلامه معايا هناك".
وتابع: "خطيبتي وقفت في ظهري، وكملت معايا، وكان في أوقات مش بلاقي تمن كارت الشحن معايا، فقررت أدخل جمعيات عشان نتجوز، وفكرنا في مشروع وقلنا نجازف بيه، وبالفعل جهزنا العربية، لأن الموضوع كان جديد عليا".
وأردف: "كملنا لحد ما وقفنا على رجلينا، واشتغلنا أول شهر، وبعدها جالي الحي وخد العربية وغرمني وحبسني حوالي 5 أيام، ودفعت الغرامة وخرجت، وعملت ممارسة من شركة الكهرباء، ورغم ذلك، الحي أخد العربية بتاعي، وغرمني 5 آلاف جنيه".
وأكمل: "روحت لرئيس الحي، وطلبت أكلمه، لأن في واحد واقف قدامي واخد التصريح، لكن اللواء رئيس الحي قالي أنا معنديش حد يقف في الحي بتاعي".
وناشد المسئولين قائلا: "عاوزهم يقفوا جنبي، ويتم ترخيص العربية، علشان ورايا بيت وخمس بنات وولدتي أمانة في رقبتي ومعنديش حد يساعدني، ولا حتى يراعيهم، وملناش مصدر دخل غير شقايا وتعبي اللي ربنا بيكرمني بيه".
