ملك أحمد زاهر: “لهجتنا الصعيدية في نسل الأغراب مفيهاش غلطة.. ومي عمر كانت تهتم بشكلنا” (حوار)
طلت الفنانة الصاعدة ملك أحمد زاهر على جمهورها في الموسم الرمضاني الجاري بمسلسل “نسل الأغراب”، بجانب كل من أحمد السقا وأمير كرارة، والمخرج محمد سامي، ولعبت شخصية “رغدة”، ابنة الفنانة منة فضالي.
وأجرى “القاهرة 24” مع ملك أحمد زاهر ذلك الحوار لمعرفة كواليس مشاركتها في “نسل الأغراب”، وعلاقتها بأحمد السقا وكرارة، وهل واجهت صعوبات في التحدث باللهجة الصعيدية أم لا، وإلى نص الحوار:
كيف كانت كواليس التصوير مع أحمد السقا وأمير كرارة؟
“رشحت للمسلسل عن طريق المخرج محمد سامي، والكواليس كانت تحفة، وأحمد السقا مشوفتش حد طيب زيه، وكان بيعاملني كإني بنته، ودايما كان بينصحني أعمل ايه ومعملش أيه، لكن أمير كرارة لم أقابله طوال تصوير المسلسل”.
ما النصائح التي وجهت لكِ من منة فضالي ومي عمر؟
“منة فضالي كانت دايما مهتمة إننا نعمل المشهد بشكل حلو عشان يعجب الناس، ودايما كانت بتشجعني، ومي عمر كانت دايما مهتمة إن شكلنا يطلع حلو، ولو شعري أو الكحل مش مظبوط كانت بتنصحني وتقولي أيه بيليق عليا أكتر”.
كم المدة التي استغرقتيها في مذاكرة الشخصية؟
“الورق جالي في بداية شهر 11 وبدأنا تصوير في بداية شهر 12، وطوال التصوير كنت بذاكر الشخصية، وبعد كل مشهد كنت بكتشف حاجات تانية أكتر عشان أشتغل عليها”.
كيف كان التعامل بينك وبين المخرج محمد سامي في “نسل الأغراب”؟
“محمد سامي هو اللي مربيني وزي أبويا وبيعاملني حلو جدا، وبيحاول يديني من خبرته وأدائه، ويمكن هو بيمثل أحسن مننا كلنا، وعايزني أكون أحسن حد في الدنيا”.
هل توقعتِ ردود الفعل التي وصلتك عن المسلسل؟
“دايما بتوقع الأسوأ، ولكنه فاق توقعاتي ومحدش يقدر ينكر إنه من أهم مسلسلات رمضان، ومن أعلى المشاهدات، والانتقادات بالنسبالنا نجاح”.
تعرض المسلسل لانتقادات بسبب اللهجة الصعيدية.. فما ردك؟
"متأكدة إننا بنتكلم اللهجة الصعيدية بدقة، ولهجتنا الصعيدي مفيهاش غلطة، وده لأن كان معانا واحد من أهم مدربين اللهجة الصعيدي وهو عبد النبي الهواري واللي كان معانا لحظة بلحظة، ومواجهتش صعوبات في اللهجة، لإني سبق واتكلمت بيها في مسلسل القاصرات".
ظهرتِ ببشرة سمراء في “نسل الأغراب”.. هل كنتِ منزعجة من ذلك؟
“ظهرت دون ميكب آب تماما، وأصبحت بشرتي سمراء بعد وضع أحد المستحضرات التي تجعلنا بذلك اللون، واللون ده هو اللي بيوحش الشكل شوية، ولكن كان لازم نظهر كدة عشان في بعض المناطق في الصعيد الناس بتكون دي درجة بشرتهم بسبب حرارة الشمس، وكان لازم نلتزم بده لأنها رؤية المخرج وخادم الشخصيات، ولكن أكيد أي حد يحب أنه يكون شكله أحلى حاجة".
هل هناك تشابه بين شخصيتك في المسلسل وشخصيتك الحقيقة؟
“مفيش تشابه تماما بين شخصيتي وشخصية (رغدة)، لأنها شخصية ضعيفة ومكسورة وغير جريئة، وبالتالي تختلف عني لأني جريئة أكثر منها، ولو والدي مثل أبيها مكانش جناحي هيبقى مكسور أوي كدة”.
ما أغرب رد فعل جاء لكِ عن المسلسل؟
“واحدة صاحبتي كلمتني بعد أحد مشاهد المسلسل، وكانت منهارة من البكاء وزعلت مني جامد لإني خليتها اتأثرت وبكت”.
ما ردك على من يقولون إن والدك الفنان أحمد زاهر يجاملك؟
“لو مش هو اللي هيدعمني، يبقى غريب لأنه والدي وطبيعي إنه يدعمني، ومفيش مرة حاول يدخلني التمثيل بالعافية، وبيتم ترشيحي لأي عمل من شركة الإنتاج والمخرج، وبرد على المنتقدين وأقولهم هاتولكم أب زيي يقف جنبكم وفي نفس الوقت ميدخلش في شغلكم أو يخلي حد يقول إننا داخلين الفن بالواسطة”.
انضميتي مؤخرا لفيلم “فارس”.. حدثينا عن شخصيتك فيه.
“هو فيلم أكشن ساسبنس وفيه خط رومانسي، وإنتاج شركة (الجذور)، وإخراج رؤوف عبد العزيز، وتأليف حسام موسى، وإحنا لسة مخلصناش تصويره ومن أحلى الكواليس اللي حضرتها، وبلعب شخصية (سماح) ابنة الفنان صلاح عبد الله، وبتتميز الشخصية بالثقة بالنفس والاندفاع في بعض التصرفات”.
