"الأب الروحي".. ميمي عبد الرازق: "مدحت فقوسة ودعني من أسبوعين بمكالمة نصف ساعة ومكانش عاوز يقفل"
علق ميمي عبد الرازق، المدير الفني الأسبق للنادي المصري البورسعيدي، على وفاة مدحت فقوسة، المدير الفني الأسبق للمنتخب العسكري، متأثرًا بإصابته بفيروس كورونا المستجد (كوفيد-19)، مؤكدًا أنه أخيه وصديقه والأب الروحي له.
وقال عبد الرازق في تصريحات خاصة لـ"القاهرة 24": “مدحت فقوسة أخويا، ربنا يرحمه وربنا افتكره في أيام مفترجة، وكان بيخدم الجميع”، مؤكدًا أنه صاحب فضل كبير عليه في كل شيء".
وأضاف ميمي: "آخر مكالمة كانت بيننا منذ أسبوعين وقعد يكلمني بتاع نصف ساعة كانت مكالمة الوداع، قعد يطمن عليا وعلى أولادي ومكانش عاوز يقفل معايا، واستعاد ذكرياته معي وقال لي فاكر لما كنت جاي من الكلية وكان عندنا ماتش وأنا عملت المحاضرة وأعلنت التشكيل وأنت جيت متأخر، وبعدين أنا عديت اللاعيبة لقيتهم 12 فطلعت الباك رأيت عشان تلعب انت وقولتلهم طالما ميمي جيه يبقى هو اللي هيلعب وقعد يضحك معايا".
وتابع: "في الفترة الأخيرة أيضًا دخل معي في مداخلة وأنا في القناة الرابعة، وقبلها دخل في مداخلة وأنا مع شيما في أون تايم سبورت قبل رمضان بحوالي 15 يومًا".
وواصل: "مدحت فقوسة كان أخويا وكان يحبني جدًا، وآخر حاجة قالها عني في التلفزيون إني من أكفأ المدربين في مصر وإني مظلوم ودي كفاية عندي والدنيا كلها، وليه عليا فضل كبير، وهو كان طيب وبيضحك على طول سواء تعبان سليم معاه فلوس مش معاه تلاقيه، بيضحك على طول".
وأشار ميمي إلى أن مدحت فقوسة كان يحب سمير حلبية رئيس المصري البورسعيدي الحالي، وهو تاريخ كبير وعمل مع أسماء كبيرة مثل بوشكاش بجانب تدريبه في الرائد السعودي وعدد من الأندية هناك.
وأردف ميمي عبد الرازق: “أحمد مصطفى نجم المصرى السابق صديق عمر مدحت فقوسة وهو الراعي الرسمي له، ولم يتركوا بعض في أي أزمة”، مضيفًا: "وفاة فقوسة في العشرة أيام الأخيرة من رمضان بسبب عمله".
واستمر: "مدحت فقوسة كان بيتحدى المرض وتخدى السرطان نفسه، وهو أخويا وصاحبي الأب الروحي ليا شخصًيًا، وسيرته الطيبة هي الذي ستسمر".
