بكاء مها أحمد على الهواء: "الناس مستنية دبيحة يحطوها قدامهم وينهشوا فيها" (فيديو)
دخلت مها أحمد في نوية بكاء شديدة على الهواء بعد استعانتها مع مشاهد في برنامجها على قناة الشمس "تفاحة مصرية" معاناة الفنان الراحل إسماعيل ياسين في أيامه الأخيرة، وذلك بمناسبة حلول ذكرى وفاته اليوم 24 مايو.
وقالت مها: “في ناس كتير أبوهم بيبقى ميت ويبقى عندهم مسرح في نفس اليوم وينزلوا يعرضوا، لإن اتعلمنا كده واتعلمنا الواجب علينا نعمل كده، لإن الجمهور ملوش ذنب، والواقعة دي حصلت مع جوزي الفنان مجدي كامل، والدته توفت الصبح، وراح دفنها وكان عنده مسرح مع نجم كبير الله يرحمه نور الشريف، ومجدي مقدرش يعتذر ومقدرش يجيب حد بداله”.
واستكملت: “الناس مبتحرمش ومبتقدرش يعني أيه كوميديان يكون عنده مشاكل في بيته وعيلته وولاده ومضطر إنه أول ما يخرج من بيته ويركب عربيته ده لو عنده عربية يمشي يوزع ابتسامات وجواه بيتقطع وبيموت بس مطلوب يبتسم علطول ويا سلام بقى لو غلط غلطة هو ميقصدهاش تلاقي سكاكين بتقطع فيه كأن الناس مستنية دبيحة يحطوها قدامهم وينهشوا فيها مش بيفتكروا إن في يوم الكوميديان ده ضحكهم مرة”.
وتابعت: “خليكوا حنينين حاولوا تفتكروا قد أيه قد أيه لكوميديان متعكم وهان نفسه وبهدل نفسه وده أكل عيش اه أكل عيش، أتحدى إن كل بيت في مصر فيه حد نفسه يمثل، أنا اشتغل أيه وأنا معايا بكالوريوس معهد فنون مسرحية وقضيت عمري كله شغلتي التمثيل.. أنا أحق دي مش أنانية لأن الاكاديميين اتعذبوا.. الرحمة كل واحد فيكم نفسه ابنه يطلع ممثل أو مغني أو لاعيب كورة، اشمعنا انتو تتمنوا واحنا لأ، اشمعنا أنتو تدوروا على حقوقكم والفنانين ميدوروش على حقوقهم!”.
نجوى فؤاد لـ"مها أحمد": "أنا زيك بقالي 7 سنين ماشتغلتش.. وربنا حياخد حقنا" (فيديو)
مها أحمد: "الناس كانت بتقرب لي لما كنت بكبوظة وأما خسيت بعدوا عني"
