“أبوكي ميت من الصبح وموجود في التلاجة".. أبناء يستغيثون من إهمال مستشفى خاص بعد وفاة شخص
"أبوكي في التلاجة من الصبح وهو ميت".. كلمات تلقتها فتاة من رجل أمن المستشفى بسخرية وابتسامة، عند زيارتها لوالدها الذي اعتقدت أنه ما زال على قيد الحياة، لتتفاجأ أنه متوفٍ منذ ما يقرب من 6 ساعات، ولكن لم يخبرهم أحد.
يقول محمد أيوب، نجل المتوفي: "كنا في الزيارة يوم السبت، وحسينا إن الوضع صعب، فقولنا للطبيب لو حصل حاجة في أي وقت كلمنا بسرعة، وتاني يوم أختي سبقتنا وهي طالعة الزيارة، قابلها رجل أمن وهو بيضحك، وبيقول لها أبوكي ميت من الصبح ومحطوط في الثلاجة، فضل من الساعة 8 لحد 2 الظهر وإحنا منعرفش".
وأضاف: "والدي قعد أسبوعين في المستشفى، وكل ما يحتاجوا فلوس يكلمونا، لكن لما مات معرفناش، وده شيء فيه شك كبير".
وتابع: "في إهمال كبير في المستشفى، والدي قعد 8 ساعات وهو مريض مش بياكل، وبعت لعمي رسالة عبر الواتساب بيقوله هات لي أكل معاك أنا جعان، تخيلوا شخص بين الحياة والموت ميأكلش لمدة 8 ساعات وهو جعان، لأن المستشفى مش بتأكله!".
بينما قال نجل المتوفي الآخر: "أنا دافع 225 ألف جنيه تحت الحساب، ودافع أكثر من المطلوب، ورغم كدة الطاقم الطبي بيطلع عند المريض من غير كمامة، كمان عملية نقله من غرفة كورونا للعناية العادية استمرت 12 ساعة، ومكنش هيتم إلا إني تدخلت، ممكن كان يأخر أكتر من كدة كمان، وهو مش قادر يتنفس".
وأردف: "والدي دخل وهو بيشعر بتعب في صدره، ونسبة الأوكسجين كانت كويسة، وبعدين الحالة تدهورت، المستشفى مش ماشي ببروتوكول صحيح، وفي الغالب الأدوية مش كويسة، لأن وضع الحالة كان ثابت لحد يوم الأربعاء، والمفروض أنه خرج من العناية، لأنه أصبح سلبي كورونا".
وناشد المسئولين قائلا: "أنا عايز حقنا من الصدمة النفسية اللي حصلت لنا، رايحين نزور والدنا، نلاقيه ميت من 6 ساعات ونعرف بالصدفة، ولما زعقنا وحصلت مشكلة، المدير قالنا إنه هيمشي الدكتور اللي كتب التقرير".
