لميس الحديدي عن خطة تطوير "المتحدة": "مش لازم لما واحد منصبه يتغير نطلع نقول ده فاسد ومغضوب عليه"
قالت الإعلامية لميس الحديدي، إن تغيير مجالس الإدارات سُنة الإدارة الاقتصادية، وعلى الجميع أن يتعامل مع هذا الأمر بشكل طبيعي، موضحة: "مش لازم لما واحد منصبه يتغير تطلع شائعات على غرار فلان غضب عليه ومعرفش مين زعل منه وناس تقول ده فاسد أو عليه علامات استفهام.. لأن الحياة مراحل ومجالس الإدارات بتخصصاتها المختلفة مراحل حيث إن كل مجلس إدارة له تخصص معين لمرحلة معينة بمجرد إنجاز مهمته يتم تطعيم مجلس الإدارة بعناصر بتخصصات مختلفة لاستكمال مهمة لاحقة في إطار خطة تطوير موضوعة مسبقًا".
وأكدت لميس الحديدي عبر برنامجها "كلمة أخيرة" المذاع على شاشة "ON" قائلة: "مش عارفة فيه إيه؟ لما حد بيقعد في منصبه فترة طويلة تطلع ناس تقلك هيفضل قاعد في مكانه مش هيتحرك والغريب لما يحصل تغيير تطلع ناس تقول غيروه عشان عامل مصيبة وانتوا مخبينها.. التغيير سنة الحياة بقينا بنشوف وزراء ومسؤولين ومحافظين بيتغيروا بشكل عادي لازم نتعود على ده وعلينا أن نتعلم أن نشكر ونحترم السابقين في مجالس الإدارات".
ووجهت الشكر لمجلس الإدارة السابق للمتحدة للخدمات الإعلامية بقيادة المنتج تامر مرسي، قائلة: "لازم نتعود نشكر السابقين في مجلس إدارة المتحدة للخدمات الإعلامية بقيادة تامر مرسي وأنا شخصياً بوجهله التحية لأنه بذل مجهود كبير وخرافي عشان نوصل لنتائج النهاردة.. لازم نتعلم أن نشكر السابقين ووجوده في المجلس الحالي أو حتى النهاردة في المؤتمر داخل القاعة هو تقليد محترم.. لازم نتعود على ده مش معقول ناس تتعب معانا وتشتغل له دور وكل مرحلة تبنى على سابقتها".
واختتمت: "الإعلام سواء حكومي أو خاص ليس مجرد أرقام لكن هو تأثير ومعلومة وخبر وتوعية وتسلية.. وجميعها عناصر مهمة تندرج تحت كلمة "التأثير" فالأرقام والأرباح مهمة لكن المكاسب المادية قد تتراجع وتتناقص في قياسها مع التأثير.. احنا قدام ناس فاهمة قيمة الإعلام فالتأثير أهم".
أشرف زكي: خطة المتحدة ستعطي فرصة لعدالة التوزيع.. وتُعيد النجوم المهمشين (فيديو)
