"يا فرجاني الفلوس مش كل حاجة".. الحاجة سوزان تكشف كواليس بيع قرطها لنادي الزمالك (فيديو)
علقت الحاجة سوزان محمد قنديل، على أنباء رحيل فرجاني ساسي لاعب الزمالك عن الفريق بنهاية عقده والتوقيع لأحد الأندية القطرية.
وكانت الحاجة سوزان قد أعلنت تبرعها بقرطها لتجديد عقد فرجاني ساسي مع الزمالك منذ فترة، لكن مجلس الزمالك أصدر بيانًا شكر فيه الحاجة سوزان على دعمها وحبها للنادي.
وقالت الحاجة سوزان لـ"القاهرة24": "أبويا حببني في الكرة، طلعت عاشقة لنادي الزمالك، ده عشق عمري، كنت أملك الكثير من الذهب وبعته لشراء شقة لبنتي، علشان كده قلت أتبرع بالحلق بتاعي لتجديد عقد فرجاني، نوايا تسند الزير".
وتابعت الحاجة سوزان: "أنا من المقطم، وبعت الحلق بتاعي ورحت النادي، أول يوم محدش دخلني، قالولي في اجتماعات، تاني يوم رحت الراجل اللي واقف على الباب قالي انتي جيتي تاني يا حاجة سوزان، قولته اه وأنا كل يوم هاجي عشان أدخل".
واستكملت: "لقيت المستشار هشام إبراهيم داخل، قالوله الست دي عاوزة كذا كذا، فقالهم لا مش هي اللي اتكرمنا إحنا اللي نكرمها وراح مديني شارة نادي الزمالك وميدالية، وقالي اقعدي ده بيتك، وقولتلته أنا نفسي أتصور مع اللاعيبة".
وواصلت: "فعلًا سلمت على اللاعيبة واتصورت معاهم، بس كنت بدور على شيكابلا عشان ده نور عيني هو وابنه آدم، كل ما أشوفه على النت بعمله قلب عشان أنا بحبه".
وأكدت أنها التقت اللاعب فرجاني ساسي، وأهدته "زجاجة عطر"، قائلة: "هو محترم أوي وقلبه أبيض، وبقول لفرجاني إحنا بنحبك كلنا 50 مليون بني آدم بيحبوك، الناس اللي في النادي مش قادرين يعملوا أكتر من كده، دي امكانياتهم، يا فرجاني الريان القطري هتقعد في سنة مش هيحبوك زينا، وانا بالأخص يا حبيبي بحبك أوي".
وتابعت: "بقوله يا فرجاني الفلوس مش كل حاجة، أنت معاك حق إنك تأمن مستقبلك لكن حب الناس مش قليل اعتبر نفسك ابن النادي، حس بالناس اللي بتحبك يا فرجاني، الزمالكوية كتير اعملوا حساب في أي بنك كلنا هنتبرع".
