غير مسموح بعباءة ولا نقاب.. تفاصيل طرد فتاة من كافيه بالتجمع الخامس (صور)
تعرضت مجموعة من الفتيات للطرد من إحدى الكافيهات بشارع التسعين، وهو كافيه خاص بشرب الشيشة، بسبب وجود فتاة بينهن ترتدي عباءة، على الرغم من أن المجموعة كانت مختلفة في ملابسها، ما بين محجبة وغير محجبة.
وقالت دينا حشيش، إحدى الفتيات اللاتي تعرضن للطرد: "الواحد كان فاكر إن لسه شهر على خناقة البوركيني والتشنج الطبقي، بس أنا افتتحت الموسم بأول قصة، أنا وفريق الشغل قررنا نعمل ميتينج مهم في التجمع في كافيه الصبح، وحد اقترح علينا كافيه شيشة بسيط في شارع التسعين".
وتابعت خلال منشور لها على "فيس بوك": "بدأنا الميتينج وكنا 5 بنات كل واحدة فينا شكل، البلوند، أنا، محجبات بأشكال مختلفة، مجموعة diverse زي إعلانات Benetton، إحنا تيم كونتنت بنكتب لـ 1.7 مليون فولورز، وأحلى حاجة فينا اختلافنا، لأننا بنوصل لكل متابعينا مهما كانت خلفيتهم".
وتابعت: "بعد ساعتين، جت أخر بنت بدموع في عينها من الإحراج، وبتقولنا مش هقدر أحضر الاجتماع، مش عايزيني هنا علشان لابسة عباية".
واستطردت حديثها، قائلة: "روحت للمدير، قولتله عيب عليك، إحنا في 2021، وقدمت قوي حوارات الخوف من الاختلاف، و برضو مش هناقشك إن لك دريس كود، حقك، ولكن أنا مديريتهم وجايباهم ومتكسفنيش قدامهم، إحنا ساعة وماشيين".
وأردفت: "لازم السينس، أنت شايف ناس محترمة فعادي المكان فاضي أصلًا، يقولي في كاميرات والمدير هيلومني ومش مسموح بعباءة ولا نقاب ولا شبشب، أنا عمري في حياتي ما اتطردت من مكان، ويوم ما يحصل يبقى في قهوة وأنا أصلا ما بشيش".
وأكملت حديثها، فقالت: "كلنا وقفنا مع صاحبتنا، وساندنا في اختيارها في لبسها و مشينا ورحنا كافيه تاني، بس متفاجئة منهم، لأنهم بتوع شيشة مش بار ولا club، فمشكلتك مع اللبس غير مفهومة ودي أخرت الإحداث، أتمنى من مدير المكان إن تشوفوا دكتور يساعدكم في حل مشاكلكم النفسية".
