فتاة تروي تفاصيل طردها من "كافيه" بالتجمع الخامس بسبب ارتدائها عباءة
تعرضت كاتبة المحتوى، نور سعد، للعنصرية من قبل إدارة كافيه بالتجمع الخامس، حيث رفض موظفو ومدير المكان دخولها، لمجرد أنها ترتدي عباءة، وسياسة المكان ترفض هذا.
وروت "نور" تفاصيل الموقف، قائلة: "كان عندي ميتنج شغل مع التيم بتاعي، وهما راحوا قبلي وطلبوا أكل وقهوة، ولبسهم منوع ما بين الحجاب وغير المحجبات، كان فيهم 3 محجبات".
وأضافت في تصريحاتها لـ"القاهرة 24": "روحت بعدهم بنص ساعة، وداخلة عادي من البوابة لقيت الموظف بيقولي عندك حجز؟ قولت له لا أنا داخلة لأصحابي هناك أهم، وشاورت عليهم، وبدأت أدخل لقيته وقف قدامي علشان معرفش أعدي، وقالي إحنا عندنا (دريس كود) وممنوع العباية والشبشب".
وتابعت: "قولت له تمام، بس لازم أدخل أبلغ أصحابي، فدخلت قولت لهم، وقامت دينا حشيش تتفاهم معاهم بهدوء، وإن إحنا الصبح وكده كده مفيش حد موجود في الكافيه، وكلها ساعة هنعمل الميتنج وماشيين".
واستطردت حديثها قائلة: “رد عليها بـ"لا"، وفي كاميرات بتصور والمدير هيحاسبني، قالتله طب مادام كده مش كاتبين ليه إن في دريس كود للمكان؟ وجت دينا قالتلنا يلا نمشي، وإحنا مش هندفع، لأن أنتم اللي قومتونا، وقالتله إحنا هنكتب عنكم على السوشيال ميديا، وصورت المكان قدامه، وطلعنا كلنا".
وأوضحت أن سبب عدم دفع الفاتورة كان عن عمد، لكي يتصاعد الموضوع ويصل للإدارة، لأنه في حالة دفعهم كان الموضوع سيمر مرور الكرام، ولن يعلم أصحاب المكان تأثير الموقف، مضيفة: "سيبنا الأكل زي ما هو، ولو عندهم كاميرات، يقدروا يطلعوها، هيبان فيها كل حاجة".
