"اكتشفت إن معمول لها عمل من فيس بوك".. امرأة تروي تفاصيل لحظات الألم بسبب "أقرب الناس" (خاص)
أثارت صورة عمل شيطاني لإيذاء سيدة وطفلها، غضبًا كبيرًا عبر مواقع التواصل الاجتماعي، وتضمن العمل صورة للمرأة وهي تحمل طفلها الصغير، مع خُصلة شعر طويلة.
وتوصلت "القاهرة 24"، للسيدة وطفلها لتروي لنا تفاصيل الإيذاء النفسي والبدني الذي تعرضت له، حيث أوضحت (آ.أ)، أنها في حالة تعب شديد منذ عامين، ولم تكن تعرف السبب الحقيقي وراء ذلك، خاصة بعد الحيرة الشديدة للأطباء في تشخيصها، مضيفة "من سنتين كده تقريبًا ابتديت أتعب وأخس بطريقه غريبة، ومش قابله أي أكل نهائي وتعب في جسمي وإرهاق شديد وعصبية بطريقة مرعبة، عدت سنة وهديت والدنيا بقت كويسة لمده شهرين بالظبط قولت الحمدلله خفيت خلاص".
وأضافت: "أنا عمري ماجه في بالي سحر أو الكلام ده، مش معترفين به نهائي، بس عارفين إنه موجود بس ربنا اللي بيجيب الابتلاء محدش غيره".
وتابعت: "الحمدلله خفيت واتجوزت وخلفت، لكن من تالت يوم ولادة ابتديت أتعب تاني تعب غريب، محدش عارف مالي، بفقد الوعي مع ترجيع دم، وحمام دم، مفيش أكل نهائي أهلي قالوا خلاص فوضنا أمرنا لربنا".
وأشارت إلى إجرائها العديد من الفحوصات الطبية، حتى انتهت بإجراء عملية جراحية بعد ولادتها بأسبوعين، مضيفة: "الغريب برضه إني مخفتش ولا الأعراض دي راحت، نفس وجع البطن المميت، وجع في جسمي كله، مع إرهاق، مفيش أكل لحد الآن على الحال ده، قالولي اتعايشي مع التعب بقي وخلاص يوم أكل ويومين لا".
وواصلت: "بشوف أشخاص في البيت، بشوف حيوانات وعايشه في رعب طول الوقت".
أما عن لحظة معرفتها بالعمل، قالت: "إمبارح جاني تليفون، عشان أشوف الصورة اللي على النت لقيت الصورة دي منتشرة على كل الجروبات، فضلت أضحك وأقول فييك أكيد مش حقيقي، لكن بليل التعب اشتد عليَّ جامد، وجبنا شيخ فضل يقرأ قرآن لحد ما هديت وفوقت وقالي هنمشي ع علاج مع بعض".
وأوضحت أن الشيخ أكد لها أن القائم بالعمل، شخص قريب منها للغاية، مشددة: "أكيد قريب مني الخُصلة اللي موجودة دي من شعري".
وأردفت: “أن هناك شبابًا متطوعين لتنظيف المقابر، وجدوا العمل الخاص بي، لذا صوروه ونشروه عبر فيس بوك، حتى أتعرف عليه”، مشيرة: "معنديش حل غير إني هفضل مع الشيخ عشان أخف".
