"أنا ابن راجل مهم".. طفل ووالده يتعديان على 3 فتيات بالشروق (خاص)
تعرضت شابة تدعى “سهيلة طارق”، 21 عامًا، لاعتداء بالضرب رفقة إخوتها من قبل طفل ووالده، أسفل منزلها بمدينة المستقبل في الشروق.
وقالت سهيلة طارق لـ"القاهرة 24": "أختي الصغيرة عندها 8 سنين كانت واقفة تحت العمارة مع صحابها، مرة واحدة جه ولد ضربها دون سبب، طلعت بتعيط وبتقول ان في ولد متعرفوش ضربها.. ماما كلمته من البلكونة، وسألته ضربتها ليه، قالها أنا حر اعمل اللي أنا عاوزه أنا ابن راجل مهم وتعدى على الأم لفظيا".
واستكملت طارق الواقعة قائلة: "مامتي سكتت لكن انا طلعت اكلمه من البلكونة، راح شتمني انا وبابايا مع أنه كان في الشغل وقت اللي حصل، قررت انزل أشوف مين الطفل ده واسلمه للأمن يعرف أهله ونشتكي، أول ما نزلت بكلمه لاقيت واحد كبير بيشتمني، بقوله انت مين قالي انا باباه، وانا بكمله ضربني على وشي".
وأضافت سهيلة طارق: "أختي نزلت عشان تبعدوا عني راح ضربها هي كمان، حاولت ابعده عنها مسك فيها ضرب على وشي ودماغي.. بوقي باظ ونضارتي اتكسرت في وشي، أنا كنت هموت".
وأكدت أنها حررت محضرًا بالواقعة، قائلة: "ده كله حصل ليلة امتحاني، وانا متأكدة أنه كان شارب حاجة".
