ابنة رجاء الجداوي في ذكرى رحيلها: "كنت حاسة البيت مظلم"
أعربت أميرة مختار ابنة رجاء الجداوي عن حالة الحزن التي مرت بها، بعد وفاة والدتها، مشيرة إلى أنها كانت ترى البيت مظلمًا بعد رحيلها، مؤكدة أنها تشعر بوجودها معها الآن، وتشعر بحب الناس لها.
وقالت أميرة، خلال لقائها مع لميس الحديدي في برنامج "كلمة أخيرة": "أنا عندي شقين في أوقات بقول معقولة الوقت الصغير ده عدى، ولما عدت السنة بقول معقولة عدت سنة…أي مكان بنروحه بنحس إنها معانا، ولما الناس بتشوفنا بتسلم علينا، الحب مش لينا هو ليها، وفي أوقات كنت بقول هعمل إيه في اللي جاي".
وأضافت: "أخذت فترة أقولهم اظبطوا الكهرباء لأن البيت مظلم، والجملة دي بتتقال مجازًا، لكن أنا كنت بقولها بجد البيت مكنش في روح رجاء الجداوي، ولكن جلست مع حد من صحابها القريبين نصحني اتخطى ده، ونصحوني أقف على رجلي وأكمل رسالتها".
واستكملت عن وضعها الحالي: "بدخل الأوضة وأكلمها، لأن احنا اللي بنقرر الإنسان يمشي أو لأ لكن هي معايا على طول، وبفتكر أيام ما كانت بتصور وأروح معاها، ولما بدخل المدينة بحس إنى جوه جزء من روح أمي".
أما عن حالتهم قبل وفاة رجاء الجداوي فقالت: "كنا بنعمل كل حاجة وكلنا عارفين اننا وصلنا لنقطة ملهاش رجوع، هي كانت معانا لآخر وقت، وكانت صابرو وقوية، كانت بتقول عايزه أقوم عشانكو لكن أنا جاهزة أقابله".
