حلا شيحة: معز مسعود لم يخطفني كما قال والدي.. وهو أكبر من كل الافتراءات ضده

أكدت حلا شيحة أنها سعيدة فى حياتها مع زواجها معز مسعود، وأنها ترفض الإهانة والتعدي عليه من أحد، خاصة بعد حديث والدها الأخير عنه.

وكتبت حلا شيخة، على الإنستجرام: “الحقيقة مصدومة من الكلام اللي والدي قاله عن زوجي اللي اتجوزته بكامل إرادتي والحمد لله لقيت معاه كل المعاني الجميلة من احترام، ورجولة وشهامة نادرة الأيام دي، وأنا لم يخطفني أحد كما قال والدي، والكلام ده لا يصح أبدًا، أنا بحب زوجي وسعيدة بحبه ليا، وبنحترم بعض ومعز بيحترم رأيي وبيقدر مشاعري وبالعكس هو دائما بيهدّيني”.

وأضافت: "وطبعا بيساندني ويشجعني لأني زوجته وحبيبته، وهو أكبر بكتير من كل الكلام اللي بيتقال عليه وافتراءات مش صحيحة، وهو أبعد ما يكون عنها لن أسمح لأحد بالكلام عنه، ولن أسمح بأي تصور خاطئ عنه بأي شكل من الأشكال، معز طول عمره له رؤيته الواضحة في الدين وحتي في الفن وهو ليس مع أي جماعة أو فئة معينة، هو يمثل نفسه وله أفكاره وأراؤه العلمية والدينية المختلفة الجميلة، وليس لأحد أن يصنفه أو يضعه في أي قالب فقط، لأن هواه لا يوافق ما يمثله معز هو في آيه في بلدنا الأيام دي بنحارب ونصارع في بعض وعايشين في قصص وهمية من نسج خيالنا عن بعض".

وإستكملت: “هو خلاص أي حد يتكلم بلغة الدين لازم يبقي متطرف أو اخواني هو مبقاش في مسلمين وسطيين طبيعيين، هو ليه كل أنواع الهجوم ده على أي حد، أنا زعلانة من والدي جدًا، لأنه يعرف معز كويس جدا، وقعدوا مع بعض كتير ووالدي يحبه جدا وشاف منه كل خير.. معز زيي اتجوز 14 سنة من عمره، وكان مستقر في حياته وعنده ثلاث أولاد ربنا يخليهم له، جمال ما شاء الله وعمره ما كان بتاع ستات زي ما بيتقال كلام لا يليق أبدا وفي الآخر زيي لم يكمل جوازه وحدث الطلاق وكلنا معرضين لده طبيعي، إنه كان بيحاول زي أي راجل محترم أنه يلاقي استقرار في حياته في الحلال ومتوفقش أكتر من مرة  ودي مش حاجة تعيب أي حد”.

 وأكملت: والحمد لله اتقابلنا وتلاقينا لأن ظروفنا قريبة جدا وعندي أولاد مثله وأولادنا شبه بعض الحمد لله واستقرينا إحنا الاتنين.. ليه ده يزعل الناس بدل ما ندعي لبعض بالخير بقينا نتصيد لبعض.. ونخوض في أعراض بعض هو حصل في مجتمعنا ده احنا جرالنا ايه.. في الآخر بوجه كلمة لوالدي الحبيب أنه لا يصح ابدا كلامك مع كامل احترامي لك وللجميع". 

واختتمت: "أنا الحمد لله سعيدة في حياتي ومع زوج اتشرف إنه زوجي وبعتز بيه وإحنا أصدقاء قبل أن نكون أزواجا وكل كلمة اكتبها وقلتها نابعة مني، وأنا متدينة بطبعي زي أي ست مصرية بتحب دينها وده لا يعيبني.. وتديني اللي بدأ من أكثر من 15 سنة من المنطقي إن معز مش هو سببه مش محتاجة حد يخطفني أو يكتب عني أو يوجهني.. هذا كلام لا يليق.. دعوا الخلق للخالق وكل واحد يخليه في حاله... ويا ريت نسمع من بعض بدل ما نسمع عن بعض.احسنوا الظن".

هل أقنع معز مسعود زوجته حلا شيحة باعتزال الفن؟ والدها يجيب