جمال العدل يرد على أزمة استايلست "كوكو شانيل": "هحط اسمها حال مشاركتها"
كشفت الاستايلست علا علي، حذف اسمها من تتر مسرحية “كوكو شانيل” بطولة النجمة شريهان، ووضع اسم مصممة الأزياء ريم العدل فقط وتجاهل باقي أفراد العمل، مطالبة بوضع اسمها.
ورد جمال العدل، منتج المسرحية في تصريح خاص لـ "القاهرة 24" على حذف اسم الاستايلست علا علي من تتر المسرحية، وقال إنه لا يعلم شيئا بخصوص ذلك الأمر، ولكنه سيعود إلى شركة العدل جروب، للتأكد من حقيقة الموضوع.
وتابع جمال العدل: “ في حالة كانت موجودة وشاركت بالعمل هحط اسمها، لو مش كانت موجودة تبقى حاجة بايخة أوي منها إنها تقول كدة”.
وقالت علا علي في تصريح خاص لـ "القاهرة 24": “إحنا كنا عدد كبير بيشتغل ومعانا ديزاينر لبناني بنشتغل وحصل مشكلة في اللبس، وتواصل معي شريف زلط ومحمد حلمي المنتج الفني، عشان أشتغل المسرحية، والديزاينر اللبناني كان عامل جزء من لبس الراقصين بس مكنش مظبوط وغيرنا لبس الراقصين لأن أنا دارسة أكاديمية فنون باليه، وعملت لبس الراقصين كله ما عدا أخر أوبريت في المسرحية، وكملت لبس إنجي وجدان وأسما سليمان وسمر مرسي، وخلصت الفصل الأول كله وجزء من الفصل الثاني، وصممت لهاني عادل 5 بدل”.
وأضافت: “وشريهان شكرتني وطلبت مني أعمل بدل الراقصين في أوبريت “المانيكان”، وبعتتلي صور الفيتينج اللي كنت هشتغل عليها، وسلمنا اللبس، وبعدها قالوا إننا مش هنلحق نكمل المسرحية وهنستعين بمصممة أزياء تكمل الجزء الباقي، وأنا سافرت برنامج صورت ورجعت وخلاص، ولما أتعرضت المسرحية انهاردة في العيد ملقتش اسمي على التتر ولقيت اسم ريم العدل بس، وده مش الطبيعي إن يتحط اسم حد واحد بس وفي شخصين اشتغلوا عليها”.
مسرحية كوكو شانيل
ومسرحية “كوكو شانيل”، من تأليف مدحت العدل، وإخراج هادي الباجوري، وإنتاج شركة “العدل جروب”، ومدير التصوير أحمد المرسي، مهندس الديكور محمد عطية، مونتير، أحمد حافظ، مصمم الرقصات، هاني أباظة.
