بكلمات مؤثرة.. بسنت حميدة تؤكد غيابها عن أولمبياد طوكيو بسبب الإصابة
تحدثت بسنت حميدة، بطلة منتخب ألعاب القوى، عن تأكد غيابها عن المشاركة في أولمبياد طوكيو 2020 بعد إصابتها بمزق في العضلة الخلفية أثناء التدريبات.
وقالت بسنت حميدة عبر حسابه الشخصي على موقع التواصل الاجتماعي: “ صحيح الأزمة اللي مريت بيها كانت كبيرة وصعبة بس من نعمت ربنا عليا وجود ناس جمبي بتحبني وبتخاف عليا بالشكل اللي شوفتو كمية الناس اللي بعتتلي رسايل محفزة جدا ليا وكتبتلي كومنت ونزلتلي ستوري وكلمتني ودعتلي عمري ما كنت اتخيلها أبدًا ولا اتصور أن ممكن يكون في ناس كتير كدا حوليا بتحبني من قلبها بجد”.
وتابعت حديثها: “أنا أسفة جدا أعذروني إني مقدرتش ارد على كلامكم ورسايلكم العظيمة ليا بس أنا الفترة اللي فاتت كنت غير مُتزنة نفسيًا ويمكن دي من أصعب الفترات اللي ممكن تمر عليا في حياتي بس الحمد لله على كل شيء”.
وواصلت حديثها: “أؤمن تمامًا أنها البداية في مشواري الرياضي وليست النهاية بالرغم من صعوبة الموقف وعدم قدرتي الآن علي تخطيه ولكن ربنا كريم جدًا، التأهل الأوليمبي لطوكيو كان نعمة عظيمة وأيضًا الإصابة المفاجئة وعدم القدرة على المشاركة في آخر وقت نعمة كبيرة من الله حتي وإن كُنت لا أراها الآن فـ رب الخير لا يأتي إلا بالخير الحمد لله دائما وابدًا، سعيدة وفخورة بكل خطوة في رحلة التأهيل الأولمبي حتي وإن لم تكتمل في مرحلتها الأخيرة ولكن السعادة متعتها ف الرحلة وليست فقط في الوصول”.
واختتمت حديثها:" شكرًا مدربي العظيم على مساندتك ودعمك ليا طول الطريق ف الوقت الصعب قبل وقت النجاح شكرً للاتحاد المصري لألعاب القوي على المجهود المبذول والدعم الكامل طول الوقت، شكرا لأهلي واصحابي وكل الناس اللي حتي معرفهاش اللي وقفت جمبي الفترة اللي فاتت كلها وشجعتني وبعتتلي كلام من أعظم ما يكون بجد كلامكم فرق معايا جدا أنتم أكبر نعمة ف حياتي انا ممتنة ليكم جدًا وبحبكم أو ي، دعواتكم بالتوفيق فيما هو قادم بإذن الله شكرًا".
