"كان بخيل وبيضربها".. تفاصيل جديدة في واقعة قتل طبيبة على يد زوجها بالدقهلية
كشف أقارب الدكتورة ياسمين ضحية القتل بـ11 طعنة على يد زوجها بالدقهلية، في ثالث أيام العيد، تفاصيل الغدر التي طالت الضحية.
وقال إبراهيم يوسف، عم المجني عليها لـ "القاهرة 24": "أنا صحيت على تليفون من قسم الشرطة بيقولي تعالوا بنتكم عاملة مشكلة مع زوجها روحنا تفاجأنا إنها مقتولة بـ11 طعنة أمام أولادها الثلاثة.. نفسي أعرف هي عملت أيه علشان كل ده".
وأضاف: "بنت أخوية كانت بتستحمل كل حاجة علشان كانت بتحبه، كان بخيل جدًا ومش بيصرف واحنا كنا بنساعدها في المصاريف، وكان بيعاملها بطريقة سيئة وبيضربها وتسبب قبل ذلك في جرح شفتها واتخيطت بـ4 غرز، وكانت بتتحمل ومش بتحكي حاجة غير الحاجات العادية وسبق وهددها بالقتل".
واستكمل: "هو النية مبيتة لأنه جه من بره وجاب السكينة وطعنها وكسر تلفونها علشان متتصلش بحد فينا، وأهله ساعدوه إنه يهرب ومسحوا جميع آثار الجريمة".
وتابع: "كانت هي اللي بتصرف على البيت، ومكنتش عايزة تخرب بيتها، مفيش أي سبب يوصل للقتل بـ11 طعنة أمام أولادها، أنا كنت عندها أول يوم العيد ومكنش في أي مشكلة".
واختتم: "بطلب بالقصاص العادل لحق بنت أخي الدكتورة ياسمين، هي مكنتش تستحق الموته دي، ربنا يرحمها ويصبرنا".
وكان تلقى اللواء رأفت عبد الباعثن مدير أمن الدقهلية، إخطارًا من اللواء مصطفى كمال، مدير المباحث الجنائية، يفيد بورود بلاغ من مركز شرطة المنصورة يفيد بمقتل سيدة على يد زوجها بـ11 طعنة، وذلك لوجود خلافات بينهم.
وعلى الفور انتقل ضباط المباحث إلى مكان الحادث، وبالفحص تبين مقتل سيدة تدعى "ياسمين.ح.ي" 26 سنة، طبيبة، على يد زوجها ويدعى "محمود.م.ع"، طبيب أسنان، بـ11 طعنة نافذة، وتركها وترك أولاده الـ3 في المنزل وفر هاربًا.
وتحرر عن ذلك المحضر لازم وجاري العرض على النيابة العامة لمباشرة التحقيقات.
